Srikanth-a number 1 a ni ta

Nimin khan Badmin­ton World Federation chuan ranking thar ber a ti chhuak a, Indian shuttler Kidambi Srikanth chuan point 76,895 hmuin world number 1 a ni.

Kum 25 mi Srikanth hian season duhawm a hmang zo chiah, nikum chhung khan Super Series title pali ngawt a la thei, Indian tlangval zingah hetiang dinhmun luah thei hi an la awm ngai lo. Hmeichhe lamah erawh London Olympic bronze medalist Saina Nehwal chu number 1 a lo ni tawh thung.

Chanchinbu lian Times of India-in Sports­person of the Year atana a thlan Srikanth hi India tan Commonwealth Games-ah a inlan mek a, mixed team huangah gold la tawhin, CWG bikah a vawi khat nan singles title a la beisei mek bawk.

Srikanth chuan, "A vawi khat nana world number 1 ka ni thei hi ka lawm hle. A nihna tak­ah chuan coach Pullela Gopichand bakah kan chhungkua leh ka inkhelh theih nana min puitu mi hrang hrangte vanga hetiang dinhmun thleng thei hi ka ni," tiin a sawi.

Srikanth hian tun din­hmunah chuan a ṭha thei ang bera Commonwealth Games khelh phawt a tum a, chumi hnuah chuan Tokyo Olympic-ah India tan medal la thei tura inbuat­saih a tum thu a sawi bawk.