Harry Kane-a'n a pet goal leh si! Salah nen an inhnaih tual tual

Tottenham Hotspur striker Harry Kane chu Stoke City laka an goal hnihna khungah puan a ni a, Premier League-ah goal 25 a khung tawh tihna a ni - top scorer ni tura a elpui ber Mohamed Salah aiin goal liin a la khung tlem zawk.

Spurs hian kar hmasa Inrin­ni zan khan Stoke City chu khual­mualah 2-1 in an hneh a, Christian Eriksen khung ve ve a ni. Mahse, Tottenham chuan an goal hnihna hian net a tawn puar hmain Kane-a taksa a fuh niin an sawi a, Premier League thuneitute hnenah hei hi ngaihtuah nawn turin an thlen.

Dilna chu
Eriksen-a'n Stoke lakah free­kick hmangin a pet lut a, Danish midfielder goal khung anga pawm a ni. Mahse, inkhelh zawh hnuah Kane chuan a dar hmanga Eriksen freekick pet chu a dan per luh thu a sawi a, "Ka fanu hming chhalin ka sawi ngam a ni," a ti.

Premier League goals accre­ditation panel chuan Kane leh Spurs ten ngaihtuah nawn tura an thlen goal hi uluk taka an zirchian thu sawiin, "Player-te thusawi uluk takin kan thli thlai a, video hmangin kha goal kha kan en let leh bawk," an ti a, goal khungtu zawka Kane puan chu thutlukna dik a nih thu an sawi.

Salah a lungawi lo?
Premier League thuneitu ten Harry Kane hnena goal khat an pek belh takah chuan top scorer ni tura inum boruak a sang sawt a, Salah dinhmun a him bik lo. Egyptian forward hian Kane-a te dilna pawm a ni tih puan a nih rualin twitter lamah thu a tarlang nghal.

Player ngawichawi nia sawi forward chuan, "Woooooooooow tak tak maw?" a ti a, Premier League-a goal 29 khung mektu hi Premier League thuneitute thutluknaah a lungawi lo.

Fiamthu thawhna!
Salah chauh a ni lo. AS Roma forward hlui ngaihdan ṭawm­puitu langsar tak tak an awm a, Eriksen-a khung vek tawh Kane-a goal khung anga pawm a ni leh hnuh­nawh hian mi tam tak nuih a ti za.

Premier League chanchina goal khung hnem ber Alan Shea­rer (260 goals) chuan, "Ka goal khung ngei, mahse ka khung anga tarlan ni ta si lo goal kua kha min pe let ve thei ang em #269 #appeal," tih thu ziakin Premier League thutlukna a nuihzat.

Lineker meuh pawh...
Player-a nih laiin Gary Line­ker-a'n Tottenham Hotspur tan season thum a khel hman a, hetihlai hian inelna hrang hrangah match 138 khelin goal 80 ngawt a khung sak hman. Premier League thutlukna avangin Kane duhsak a ni a, hei vang hian Spurs striker hlui hian a club hlui a dim chuang lo.

Leicester City aṭanga a hming chhertu forward chuan, "England tana ka goal khung ngei nia ngaih paruk vel chu ngaihtuah nawn tura thlen a ngai a ni. Belgium nen kan inkhelh ṭuma David Platt-a'n a volley luh lai te khan pen riat vel leka hlaah ka awm a, goal kha ka khung anga sawi a nih theih nan ka awm hnai tawk em? England tana goal khung hnem ber ka ni mai thei asin," a ti.

Barcelona forward hlui hian England tan match 80-a khelh aṭangin goal 48 a khung a, Three Lions tana khung hnem ber Wayne Rooney-a'n match 119-ah goal 53 a khung.

Salah belchiang ila
Mo Salah-a'n Liverpool tan Premier League match 31 a khelh aṭangin goal 29 a khung tawh a, Liverpool-in Premier League match nga khelh tur an la nei. Match nga zinga match thum hi Reds-in an khelmualah an khel dawn a, Bournemouth, Stoke City leh Brighton an mikhual ang.

Liverpool-in khualmuala an hmachhawn tur hi West Brom leh Chelsea an ni a, Merseyside club fixture en chuan Salah hian goal a la khung belh leh ngeiin a rinawm - goal a khung miah lo a nih pawhin Kane tan Salah lehpel tur chuan hmabak match rukah goal nga khung a ngai dawn.

Hriat tel atana ṭha erawh Liverpool hian Champions League semifinal an khel hah dawn a, Jurgen Klopp-a'n hmabak match ngaah inelna hrang hranga goal 39 khung tawh Salah a chhawr vek kherin a rinawm loh.

Kane dinhmun
Kum 24 mi Kane-a'n league-ah goal 25 a khung ta a, Salah umphak turin match ruk hmabak a la nei - Liverpool fixture nena khaikhin erawh chuan Spurs striker hi golden boot dawng tura dinhmun chhe zawk niin a lang.

Tottenham hian Inrinni zanah Manchester City an mikhual dawn a, Watford, Newcastle United leh Leicester City an mikhual tur pawh team ṭha vek niin Brighton leh West Brom pawh khualmualah a ni dawn a, hna a awlsam lo ang.

Arsenal legend Thierry Henry-a'n Premier League season thum chhung a zawnin top scorer dinhmun a lo luah tawh a, Kane hian Salah lehpela top scorer a ni thei a nih chuan French striker ropui hnua Premier League-a season thum chhung a zawna top scorer ni leh thei hmasa ber a ni dawn tihna a ni.