PVL semifinal khel tur a hriat kim

Tualchhung volleyball inelna sang ber RS Traders Pro Volleyball League semifinal khel tur a hriat kim ta. Nilaini zan khan Hunthar Vengin Anastasia, Electric Veng chu 3-0 in an hneh a, he result avang hian Tuichangral chu a sang pali zingah an tel theih phah.

R. Dengṭhuama Indoor Stadium, Mualpuia inkhelah champion lai Hunthar Veng hian, PVL champion hmasa ber Anastasia hmaah 25-17, 25-20, 29-27 in hnehna an chang, 2016 final-a an ngam loh laka phuba an lak zan hian Ranveer chuan point 28 hmuin point 13 a hloh thung, a vawi hnih nan RFL Plastics Player of the Night atan thlan a ni.

Hunthar Veng hian league round an khelh tur an khel kim chiah a, match nga an khelhah vawi thum chakin point 10 an hmu; hmahruaitu Durtlang North nihrual chiah mah se kai thar team hian match khat khelh hmabak an la nei thung.

Beisei phak lo Anastasia erawh match li an khelh tawhah chak ni hmel an hmu miah lo a, point li nei ve mah se an chunga awm Tuichangral an umphak thei tawh lo. Kai thar Tuichangral (6 points) hian match khat khelh hmabak nei chungin semifinal an luh theih phah a ni.

MVA hnuaia team ṭha paruk inel zingah Durtlang North, TNT, Hunthar Veng leh Tuichangral ten semifinal a lut ta a, table hnuai lama awm pahnih ITI Veng leh Anastasia te erawh an tla thung.

Nizan khan TNT leh Durtlang North ten an league match hnunung ber an khel a, he thu buatsaih lai hian result kan hre hman lo. Team pahnihte hian hnehna an chan dan a zirin league hmahruaitu an la ni thei. Zanin hian league round kharna neih tur niin, beisei nei tawh lo ITI Veng leh Tuichangral te an intawng ve leh bawk dawn a ni.