Sushil Kumar-a'n gold a la

Commonwealth Games 2018-a India-in beisei a neih sanna wrestler Sushil Kumar chuan Indian mipuite beiseina a ti thlawn lova, men’s freestyle 74kg final-ah South African wrestler Johannes Botha chu 10-0 a hnehin gold a la–Sushil hian 2010 leh 2014 CWG-ah gold a lo la tawh bawk.

Rahul Aware chuan Sushil Kumar hnungzuiin Canada wrestler Steven Takahashi chu men’s 57kg freestyle final-ah 15-7 in a hneh ve bawk a, gold a la. Kum 26 mi wrestler tan CWG-a a medal hmasa ber a ni.

Hmeichhe lamah Babita Kumari chuan women's 53kg freestyle-ah silver a la ve bawk a, Canada mi Diana Weicker a hneh zo lo. Babita tan CWG inelnaa a zawna medal a lak vawi thumna a ni a, 2014 khan gold medal lain 2010 khan silver medal tho a lo la tawh bawk. Babita bakah hian Kiran chuan Women's freestyle 76 kg-ah bronze a la ve bawk.

Hetihlai hian Tejaswini Sawant chuan women’s 50m rifle prone-ah nimin khan silver medal a la a, Singapore shooter Martina Lindsay Veloso a tluk lo a ni. Seema Punia leh Navjeet Dhillon te chuan discus throw-ah silver leh bronze an la a, athletics-a India-in medal a lak hmasak ber a ni.