Barca-in Granada an draw

Barcelona-in khelmual pawn lama buaina chinfel an tum mek laiin khelmual chhungah harsatna an tawk. Catalan club hian Champions League match hmasa berah Bayern Munich 3-0 in ngawtin Nou Camp-ah an hneh lo a, Thawhṭanni zan khan an mualah Granada nen 1-1 in an inhnehtawk.

Ronald Koeman-a hote hi siphurh suttu zawk an ni a, La Liga match li khelh tawhah point riat chiah an hmu. Lionel Messi chhuahsan Barcelona hi khelmual chhungah pawh an buai a, Dutch manager Koeman-a hmalam hun pawh a chiang ta lo.

An vanduai
Barcelona-in sum lama an tlakchhiat avangin Messi an chhuah a, loan hmangin Antoine Griezmann leh Miralem Pjanic te an chhuahtir bawk. Catalan club harsatna belhchhah turin Ansu Fati, Jordi Alba, Martin Braithwaite, Ousmane Dembele, Pedri leh Sergio Aguero te an chhawr thei lo.

Chutihrualin Barca tana bul ṭantut zingah Serigo Busquets, Philippe Coutinho, Frenkie de Jong leh Memphis Depay te an awm avangin Granada laka chak thei tur an ni a, Gerard Pique pawh bench-ah an la ṭhutir zawk.

Goal khat ve ve
Granada-in goal an khung hmaaa minute hnihna lekah left back Sergio Escudero cross ṭha zet chu Domingos Duarte-a'n hmahruaina goal a tauh lut.

Goal aluh hma avangin inkhel a hmuhnawm a, Barca erawhin inkhel an thunun thei chuang lo. Granada captain Jorge Molina chuan hnai tak aṭangin a pet over.

First half injury time-ah Catalan club wing back Sergino Dest-a shot-cross chu goal-ah kalin keeper Luís Maximiano-a'n a dang ṭha hle. Second half-ah Barca goal bawh a na hret a, goal hmaah Memphis Depay a chefuh thei lo.

Minute 90-naah Barcelona-in siphurh an sut hram. Box chhungah subsitute Gerard Pique-a'n rilru fim a hmang a, Gavi hnenah ball pein Barca rawlthar cross chu defender Ronald Araujo-a'n ṭha zetin a tauh goal a, 1-1 in inkhel a tawp.

Engtin zel?
Tun nipui bazara Barcelona an talbuai lai khan coach Koeman hi chhuak tura sawi a ni hman a, tunah erawh a cham ta zawk. Koeman chuan, "Ka zarah Barcelona-in hmabak êng tak an nei. Spain-a team ṭha ber nih leh Champions League nomawi kan chawi thei ang em, tih erawh hunin a hril ang," tiin Bayern Munich an hmachhawn hmain a ṭawng chhuak.

Dutch manager inhrosak hnuah Barcelona-in result ṭha an nei lo a, Granada nena an inhnehtawk zawh hian Koeman chuan a hmalam hun chungchang zawhna a chhan loh tur thu a sawi.

Inkhel tawp rualin Barcelona ṭantuten an player-te hi an auh el avangin Koeman hi ban theih dinhmunah a dingah a ngaih theih. Dutch manager chuan, "Kan player-te hi en ula, tiki taka khel turin in beisei a mi? Kan tih theih a, ṭha berin kan khel a, khelh dan dang hmanga chak kan tum. Player mal leh mala bum mai thei tur player kan nei lo. Engkim mai hi ka sawisel niin a lang mai dawn a, chuvangin thil dang ka sawi belh dawn lo," tiin a sawifiah.

Khawthlang media-te chuan Koeman-a thlakna tur manager an inrinsiak ṭan der tawh a, chung zingah chuan club legend Xavi, Chelsea manager hlui Antonio Conte, Belgium coach Roberto Martinez, Leicester City manager Brendan Rodgers leh Ajax manager Erik ten Hag te pawh sawi rik a ni.