MFA leh Mizoram Youth Commission thawk dun dawn

Mizoram Football Association chuan football hmasawnna tur leh ṭhalaite eizawnna kawh hmuh kawngaa thawk dun turin nimin khan Mizoram Youth Commission nen thawhhona thuthlung an ziak.

MYC chairman Dr Vanlaltanpuia, MLA chuan, "MYC hi ṭhalai zawng zawng huap tur a ni a, ṭhalai zinga lehkha thiam deuh bîkte pual a ni lo a, ṭhalai tute pawhin an ban phak a ni tur a ni. Hemi kawnga MFA nen ṭang khawpa ṭhalai tam zawk tana eizawnna kawng kan dap thei tur hi ka lawm takzet a ni," tiin MFA nen an thawk dun tur chu lawmawm a tih thu a sawi.

MYC hairman chuan coach education lama MFA nen an thawk dun tur chuan ṭhalaite tán hmasawnna a thlen ngei a beisei thu a sawi a, hripui leng a ziaawm hun chuan tun aia huap zau zawka MFA nen thawh dun theih a beisei thu a sawi.

MFA honorary secretary Lalnghinglova Hmar pawhin thu sawiin, "MYC nen kan thawk dun tur hi MFA tán a chhinchhiahtlak a, hei hian kan hlutna pawh a belhchhah dâwn a ni. Football hmanga ṭhalaite eizawnna kan zawnpuina kawngah thawhpui tur ṭha tak kan nei hi kan lawm takzet a, anni nen kan thawh dun ṭhat chuan hmasawnna lian zawk kan neih ngei a beiseiawm," tiin MYC-in hmathlir an neihte chu MFA kal dan zawng, ṭhalaite tana ke penna a nih thu a sawi.

MFA honorary secretary chuan football khelmual chhungah mai ni lo, khelmual pawnah pawh eizawnna tur tam tak hai chhuah tur a awm thu sawiin coach education hi chumi kawngah chuan a ṭangkai thu a sawi.

MFA senior vice president PC Vanlalhruaia chuan, "Hripui avangin khelmualah inkhelh theih a ni lo a, chu hun remchanga coach development lam kalpuina tura MYC in rawn pen chhuak hi kan lawm hle a ni," tiin a sawi.

Inremnaah hian MYC leh MFA hian kum 2021 chhungin Football Coaching Development Programme leh Football Symposium an buatsaih dâwn a, hengte hi MFA-in a buaipui ang a, a senso hi MYC lam tum tur niin Rs 4,95,575/- dah a ni.

MFA hian football coach-te tan coaching license course hrang hrang a buatsaih ṭhin a, hengte hi hripui leng avangin hun eng emaw chen kalpui theih a ni lo a, hei hi MYC nen thawk dunin chhunzawm leh thuai a tum a ni.