Federer-a'n chawlh a la tum lo

Roger Federer chuan a khup hliam an zai hlawhtlin thu a sawi a, engtik hunah nge tennis a khelh leh theih dawn la hriat loh mah se chawlh tumna a neih rih loh thu a sawi; season tharah pawh an hmel an hmu chhunzawm ngei ang.

Swiss star hi tun hnaiah a khup dinglam vawi hnih ngawt zai a ni, zai hlawhtling ṭhin mah se 100% chuan a dam thei meuh lo. Season tir lamah khan a lo kir a, mahse Wimbledon hnu lamah a la inkhel leh thei rih lo.

Kum 40 mi Federer chuan, "Zawi muangin hma ka sawn zel, buaina leh harsatna te hi ka inhneh tir ngai lo a, ka hnuchhawn zawk ṭhin. Thil hi kan duh leh beisei ang veka a thleng lo a nih pawhin hmalam kan thlir tlat tur a ni.

"A rang thei ang berin tennis court-a kir leh ka duh, chutih rualin hmanhmawh lutuk vanga taksa dinhmun nawr nat lutuk erawh ka tum lo, hriselna mil tawk zela chet ka zir a ngai," tiin a sawi a, chawlh mai chu a la tum lo hle.

Federer hian Grand Slam nomawi 20 a chawi tawh a, a elpui Rafael Nadal leh Novak Djokovic ten an nihrual mek. Nadal-a'n French Open-ah khum tum mah se a thei lo, US Open khelh zawh takah Djokovic-a'n record siam thum mah se a thei rih bik lo.

Player pathum hian an hun hnuhnung lam an hmang mek a, kum naupang ber Djokovic hian hun a la ngah bera ngaih a ni. Chutih rualin player ṭha an rawn chhuak mek zel, an hun a liam hunah tuin nge major title kawl hnem ber ang tih chu hriat chakawm tak a ni.