League Cup-ah Man United Vs West Ham

Premier League kartawp inkhel huhnawm takah Man-chester United-in West Ham United 2-1 in an hneh a, Ole Gunnar Solskjaer leh David Moyes-a hote hi zanin League Cup third round-ah an inkhel lehnghal dawn.

Man United leh Hammers hi zanin dar 12:15 hian Old Trafford-ah an inhmachhawn dawn a, kar liam ta inkhel avangin ngaihven a hlawh ang. Club pahnih hi Europe inelnaa an tel ve ve avangin an vawi khat inlanna tur a ni.

London Stadium-ah Ham-mers tan Said Benrahma-a'n goal hmahruai a khung a, Man United-in Cristiano Ronaldo leh Jesse Lingard hmangin an chhanglet a, keeper David de Gea-a'n Mark Noble penalty pet a dang bawk.

Zaninah erawh match thuma goal li khung thei Ronaldo hahdamtir hun a nei thei ang a, Spanish keeper De Gea aiah Dean Henderson a luh a rinawm bawk.

Ole Gunnar Solskjaer-a'n bench lama a dah ṭhin player Eric Bailly, Victor Lindelof, Diogo Dalot, Donny van de Beek, Juan Mata leh Anthony Martial te a chhawr a nih pawhin a mak lo ang.

Borussia Dortmund aṭanga Man United zawmtu Jadon Sancho-a'n beisei a la pha lo a, Ronaldo-a'n a hliahkhuh hneh hle. Portugal captain hi a awl a rinawm avangin kum 21 mi winger Sancho tan hming chherna hun a ni thei ang.

Season tawp ruala contract tawp tur Lingard pawhin bul a ṭan ngei a rinawm. Hammers laka chakna goal khungtu Lingard hian contract thar a ziah theih nan match khelh tam a mamawh.

Inhliam vangin tun season-ah Edinson Cavani a la inlan lo a, Uruguayan forward hi a dam ṭha tawh a nih chuan a inlan thei bawk. Player dang Alex Telles, Amad Diallo leh Marcus Rashford te erawh inhliam vangin an la khelh theih a beiseiawm loh. Man United hian squad-ah rawlthar duhawm Anthony Elanga, Teden Mengi, Hannibal leh Shola Shoretire te bench-ah an dah thei bawk.

West Ham tana chanchin lawmawm chu club top scorer Michail Antonio-a'n hremna a hmang zo a, Old Trafford-ah a inlan thei ang. Man United lamin player an thlak hlawk a rinawm rualin David Moyes-a erawh squad a neih chhah tawk loh avang leh phuba la turin player ṭha chhawr a rinawm hle.

Man United hian kartawp Premier League inkhelah Aston Villa an mikhual dawn a, West Ham-in Elland Road-ah Leeds United an hmachhawn thung ang.

Thlirna Tawi
• Liverpool leh Manchester City-in vawi riat ve ve nomawi an chawi tawh a, Reds hi pahnihna vawi li niin record an nei ṭha ber a, Man City hi final-ah vawi khat chiah an la chak lo.
• Liverpool champion hnuhnun ber hi kum 2012 daih tawh kha a ni a, hemi hnu hian Man City erawhin nomawi vawi ruk an chawi tawh. Pep Guardiola hote hi inelna hnuhnung paliah an champion vek.
• Aston Villa (5), Manchester United (5), Chelsea (5), Tottenham Hotspur (4), Nottingham Forest (4), Leicester City (3), Arsenal (2), Norwich City (2), Birmingham City (2) leh Wolves (2) ten vawi khat aia tam nomawi an chawi tawh.
• League Cup-ah hian team 92 an tel. First round-ah hian team 70 an inlan a, Premier League club an la tel lo. Second round-ah team 50 an inlan a, Premier League club 13 an tel ṭan. Hetah hian Europe khel tur club pasarih an tel lo.
• Tuna an khelh hi third round a ni a, team 32 chiah an awm tawh. Europe-a khel Premier League club-te an inlan ṭan chiah bawk.