Indian Super League: Club neitute an hausa tawk em?

European football club-te hausak dan kan hria a, club lian leh tenau thlengin kan bel em em - an leiba neih dan lamin kan hria a, kan club ṭan an hausak chuan ralkhat aṭangin nuam kan lo ti ve veng veng a!

Mahse, hetihlai hian kan ram chhung ngeia football league sang ber, Indian football hmel thlak danglamtu Indian Super League club-te hausak dan leh sum hman dan erawh kan hre chiang lem lo.

ATK Mohun Bagan leh Mumbai City te hausakzia hi chu transfer bazar-a an sum hman dan aṭang ringawt pawhin a chiang a, club dang hi enge an dinhmun ni ve ang le?

ISL awm hnuah Indian football kalphung a pangngai sawt a, player-te pawh kum khat lek contract ziak ṭhin khan kum hnih, kum thum, kum nga thlengin an ziak a, an dinhmun a ṭha ta hle - heng zawng zawng thlen theih chhan chu club kalphung a pangngai ve tak vang a ni a, a chhan bulpui ber erawh club-ten sum an neih vang a ni.

ATK Mohun Bagan
RPSG Group chuan Kolkata club lianah hian 80% share an nei a, anni hi ATK club dintu an ni. Mohun Bagan nen an inzawm tak avangin Bagan lam hian 20% share an nei ve bawk a, RPSG Group hausakna hi dollar tluklehdingawn ruk chuang a tling.

Club chairman Sanjiv Goenka hausakna hi dollar tluklehdingawn 1.8 a tling nia sawi a ni a, Premier League club neitu tam tak aiin kum 60 mi Indian sumdawng hausa hi a hausa zawk tihna a ni.

Bengaluru FC
India rama club kalphung pangngai ber thlang dawn ta ila Bengaluru hian pakhatna dinhmun an hauh loh pawhin tlarhmaa ṭhutna hauh ngam tur chu an ni ve. Anni hi JSW Group ta an ni a, he company hlut zawng hi dollar tluklehdingawn 13 a tling.

Club chairman hi Sajjan Jindal a ni a, ani hi JSW Group-a chairman leh managing director ni lai a ni a, an chhungkaw hausakna chu dollar tluklehdingawn 14.5 niin an sawi - Premier League club zingah ani aia sum ngah chu Manchester City neitu Mansour bin Zayed Al Nahyan chiah a ni.

Chennaiyin FC
Jeje Lalpekhlua vang ringawt pawha Mizo zinga hriat hlawh tak Chennai club hi Bollywood star lar Abhishek Bachchan, cricketer lar MS Dhoni leh sumdawng hausa

Vita Dani te ta a ni a, dollar tlukleh-dingawn hausakna em nei lo mah se anni sum neih pawh hi a namai lo hle.

Abhishek-a hausakna hi dollar maktaduai 30 bawr vel nia sawi a ni a, a pa Amitabh Bachchan hian dollar maktaduai 455 vel hausakna a nei a, a nupui Aishwarya Rai hian dollar maktaduai 100 vel a nei niin an sawi - 11EVEN Sports neitu Vita hian dollar maktaduai 19.25 vel hausakna a nei a, a pasal Jalaj Dani hausakna hi dollar maktaduai 104 vel a ni a, Indian cricketer lar Dhoni hian dollar maktaduai 110 hausakna a nei nia sawi a ni bawk.

East Bengal
Kolkata club larah hian Shree Cement Ltd. chuan 76% share an nei a, East Bengal hian 24% share an nei thung. Shree Cement Ltd. managing director Hari Mohan Bangur hian dollar tluklehdingawn 8.7 vel hausakna a nei!

East Bengal hi season hmasa lama Liverpool legend Robbie Fowler pawh coach atana laluttu kha an ni a, sum sen an inhuam chhan kha a hriat ta viau.

FC Goa
Goan club hi Jaydev Mody (65%), Venugopal Dhoot (23%) leh Virat Kohli (12%) te ta a ni a, Delta Corp Limited chairman Jaydev hian dollar maktaduai 75 vel a nei nia sawi a ni a, uanpui tham pawisa a nei.

Venugopal Dhoot hi Videocon neitu niin a hausakna hi dollar tluklehdingawn 1.7 vel nia sawi a ni a, Indian cricketer lar Kohli hian dollar maktaduai 170 vel chu hausakna a neiah ngaih a ni a, chawlhni zing sa leina turah a buai lo.

Hyderabad FC
Mizo tlangval Lalbiakhlua Jongte khelhna Hyderabad FC neitu hi Varun Tripuraneni, Vijay Madduri leh Telugu actor lar Rana Daggubati te an ni a, Vijay leh Varun te hi IT company Incessant technologies neitu niin an company hlut zawng hi dollar maktaduai 100 bawr vel nia sawi a ni.

Actor lar Rana Daggubati hi ISL-a club neitu zingah chuan sum ngah lo ber pawl a ni - ngah lo tih lemah dollar maktaduai ruk chu a nei e!

Jamshedpur FC
Mahniin khelmual JRD Tata Sports Complex an nei thlap a, an khelmualah fans 23,887 vel an leng - mahnia league khelhna tlak khelmual neih ringawt pawh hi Indian football-ah chuan thil ropui a ni a, mahse, he club neitu Tata Group hausakna thlir chuan a awm lo hran lo.

Tata Group hausakna ringawt hi dollar tluklehdingawn 300 chuang anga ngaih a ni a, chuvang chuan he club hi an hausak tawk tih hriat tur - club CEO hi Mukul Choudhari a ni a, Sports Excellence Centre - Tata Steel-ah Mukul hi hotupa ber a ni mek.

Kerala Blasters
Mizo tlangval K. Lalṭhathanga 'n duhsakna a hlawhna hmun club Kerala Blasters neitu ber chu Magnum Sports Ventures Pvt Ltd an nia, anni bakah hian Telugu actor Chiranjeevi, sumdawng hausa Nimmagadda Prasad, actor lar Akkineni Nagarjuna leh film producer Allu Aravind ten share an nei bawk.

Chiranjeevi hian dollar maktaduai 200 bawr vel hausakna a nei nia sawi a ni a, Nimmagadda Prasad hian dollar maktaduai 300 chuang a nei a, Nagarjuna-a'n dollar maktaduai 123 vel a nei a, Magnum Sports Ventures Pvt Ltd lam sum neih zat a chiang tlat lo thung.

Mumbai City
Vaibelchhe hnih chuanga Lalengmawia lei duhtu kha an ni a, City hi hun engemaw chen chu sumah an talbuai dawn lo. Manchester City neitu City Football Group (65%) thuhnuaiah tho an awm a, Bollywood actor lar Ranbir Kapoor (35%) leh Bimal Parekh (35%) ten share an nei bawk.

CFG lamin sum an ngah thawkhat tih a hriat a, Ranbir Kapoor-a'n dollar maktaduai 45 vel a nei a, chartered accountant lar Bimal-a hausakna hi dollar maktaduai 12 chuang a nih avangin Mumbai ṭantu tan pawh ngaih a ṭha khawp ang.

NorthEast United
Rochharzela leh Lalrempuia Fanai te awmna NorthEast United hi ISL club zinga sum lama pachhe ber an ni a, transfer bazar-ah pawh uchuak taka sum sen aia fimkhur taka bazar ṭhin an ni a, club neitu hi Bollywood star lar John Abraham a ni thung.

John Abraham-a hausakna hi dollar maktaduai 34 bawr vel nia ngaih a ni a, a nupui, financial analyst lar ṭhin Priya Runchal chuan Highlander-ah hian executive director hna chelhin Guwahati club enkawltu ber a ni.

Odisha FC
Mizo tamna Odisha FC neitute hi GMS Inc. an ni a, a tirah Odisha club hi Delhi Dynamos hming puin Delhi-ah din a ni zet a, mahse, August 2019 khan Dynamos hian awm hmun thlakin Bhubaneshwar an pan a, Odisha FC an inti nghal.

GMS Inc. hausakna hi dollar tlukleh-dingawn 1.86 a ni a, player-te hlawh bat an neih hmel rih lawk loh - he club hian Lalhrezuala Sailung, Paul Ramfangzauva, Samuel Lalmuanpuia, Daniel Lalhlimpuia, Jerry Mawihmingthanga, Isak Vanlalruatfela, Lalruatthara leh Isaac Vanmalsawma te an kawl mek!