England-in Pakistan tlawh dawn lo

England cricket team-in October thla hian Pakistan tlawh turin ruahmanna an siam vek tawh a, amaherawhchu New Zealand-in inkhelh an ṭhulh avangin England and Wales Cricket Board (ECB) pawhin mipa leh hmeichhe team hi zin tir lo turin thutlukna an siam.

England mipa team hian kum 2005 hnua a vawi khat nan Pakistan-a inkhel turin ruahmanna an siam a, hmeichhe team erawh an vawi khat zinna tur a ni thung. Tunah erawh Pakistan rama inkhelh a him tawk loh avangin an zin dawn ta lo.

ECB chuan, "Pakistan-a zin hi a him tawk loa hriatna a awm. Ruahmanna anga kan kaltlangpui a nih chuan a zin turten pressure nasa tak an nei dawn a, Covid-19 vanga kan buaina tawh mek nen kaltlangpui chiah kan ngai lo a ni," tiin thuchhuah an siam.

Kar liam ta Zirtawpni khan New Zealand chuan an himna ngai pawimawhin Pakistan nena an inkhel tur chu an ṭhulh a, ECB pawhin Black Caps vang hian an ruahmanna siam tawh chu an ṭhulh ve leh a ni.

Kum 2009 khan Sri Lanka cricket team chu Lahore-ah Islamist hel pawlin an bei chiam tawh a, police mi paruk leh civil mi pahnihin nunna an chan. Kum ruk chhung Pakistan-ah international cricket khelh a ni lo a, kum 2015 khan khelh ṭan a ni leh chauh.