Match li chak zawn thei Napoli
Napoli chuan Udinese 4-0 in an sawp a, tun season Serie A match lo an khelh tawh chinah an la chak fai vek - point 12 hmuin table hmahruaitu an ni; an hnuaiah hian champion lai Inter Milan leh AC Milan te an awm.
Zanin hian season bul ṭan fuh lo Juventus an inlan dawn a, dar 10:00-ah Spezia an lenchilh ang. Old Lady hian point thum an hmu lo a nih chuan manager thar Massimiliano Allegri hma hun pawh a chiang lo chho viau tura ngaih a ni.
100% Napoli
Inkhel ṭan aṭanga minute 24-naah Victor Osimhen chuan Lorenzo Insigne thawh rah sangin goal hmahruai a khung a, chawlhlawk hmain Amir Rahmani chuan khung belh lehin chawlhlawk hmain 2-0 in hma an hruai a, chak tur a chiang thawkhat tawh.
Second half-ah pawh thil a danglam tam lo, defender Kalidou Koulibaly leh Hirving Lozano ten an khung belh a, harsatna liam tham tawk loin khualmualah point thum an hlawh chhuak, goal khung tuma vawi 18 zet an pet avangin goal tam zawk khung thei turin an khel ṭha.
Napoli hian hun rei tak chhung chu Serie A an khel tawh, mahse kumin anga season bul ṭan fuh hi an la nei ngai lo - Ningani zanah Sampdoria an hmachhawn zui leh dawn a, kar tawpah Cagliari nen an inkhel leh bawk ang.
Hmabak a la tam
Luciano Spalletti enkawlna hnuaiah bul an ṭan fuh avangin fak an hlawh a, eng chena thui nge an chet ṭhat theih dawn tih erawh hriat a la ni lo. Captain Lorenzo Insigne chuan a bul an ṭan chauh thu a sawi.
Italy international Insigne chuan, "Tun dinhmuna hmahruaitu nih hi chu engmah lo mai a ni, a pawimawh zawk chu ṭha taka kan khel thei hi a ni a, coach-in kan ṭhat dan ber tur a duang chhuak thei hi a lawmawm lai chu a ni bawk.
"Sampdoria nen match hautak kan khel leh dawn, chuvangin chawl hman pawh kan ni dawn lo," a ti. Insigne hi goal hmahruai khung tur a ni, mahse a ball petin line a thlen hmain Osimhen-a'n a lo khawih, Napoli captain chuan team an nih avangin engmah pawina a awm loh thu a sawi.
Harh ngai Juve
Juventus hian a zawnin league match li chhung chak ni hmel an hmu ta lo. Old Lady tan zahna tham a ni a, tla thei dinhmunah an din hial avangin a rang thei ang bera thawh chhuah an ngai - zaninah chak ngei ngei an tum ang.
Juve leh Spezia hi tun hmain vawi riat an intawng tawh, vawi hnih ve ve chakin ṭum li chu an inhnehtawk. An sulhnu en mai chuan Allegri naute tan hna a awlsam dawn lo, player nei ṭha lo zawk Spezia hian an hlau dawn bik lo.
AC Milan laka goal khungtu Alvaro Morata dinhmun a chiang lo a, midfielder Aaron Ramsey, Arthur, Mattia De Sciglio leh Kaio Jorge te chu hliam vangin an la khel thei dawn lo vek, an ṭhat dan takin an la khel thei dawn lo tih a chiang.