Osaka leh Halep an hnung tawlh zel

Women's Tennis Association chuan world ranking thar a ti chhuak leh ta a, tun hma lama number 1 dinhmun pawh lo luah zak zak tawh Naomi Osaka leh Simona Halep te chu an hnungtawlh zel - player pathum ve ve in an zuan khum a ni.

Rilru lam harsatna a neih hnuah Osaka inkhel ve leh tawh mah se, a duh leh beisei ang ngawtin result ṭha a nei nghal bik lo. Grand Slam vawi li champion tawh hi pangana aṭangin pariatnaah a tla hniam.

American star hi tun season chhungin a inkhel tam tawh lo mai thei, hei vang hian season thar a thlen meuh chuan ranking hniam deuh tak aṭanga bul a ṭan thar leh a ngai dawn a nih hmel.

Wimbledon champion Halep pawhin beisei a phak lo zel. Romanian star hian hliam a nei a, mahse a dam tawh. Tun hnaiah erawh result a nei ṭh a lo, 14-na a nih tak avangin season tawpa a thiam pariat khelh tur WTA Finals pawh a hlat ta hle.

Ashleigh Barty chu a chung berah a la awm chhunzawm zel a, Australian star hian number 1 ni chungin kum tawp a hman leh hmel. French Open champion Barbora Krejcikova chu pangana niin, tennis a khelh china a ranking san ber ṭum a tawng.