FIFA-in online meeting nei dawn

Football thuneitu sang ber FIFA chuan inelna kalpui dan tur chungchangah September 30 hian online meeting a nei dawn. An thusawi ho tur zingah hian kum hnih dana FIFA World Cup neih chungchang pawh a tel ang.

FIFA hian mipa leh hmeichhe calendar an sawiho dawn a, tuna hmeichhe calendar hmanlai hi 2023-ah a tawp dawn a, mipa calendar hi 2024-ah a tawp dawn thung.

FIFA chuan, "International calendar duh khawp lohna lian tak a awm a, siamṭhat a, thlak danglam duhna a awm. Tuna meeting hi hemi chungchang sawihona hun ṭha a ni ang," tiin thuchhuah an siam.

Europe-a football thuneitu sang UEFA, South America-a football thuneitu sang CONMEBOL bakah Europe-a league lian hoin kum hnih dana World Cup neih an duh loh thu hi an tlangau pui tawh a ni.