Siamṭhat ngai kan ngah - Nuno

Tottenham Hotspur manager Nuno Espirito Santo chuan Chelsea hneh lo mah se a naute chungah rinna a nghat ngam a, chutih rualin hmasawn tur chuan siamṭhat ngai tam tak an neih thu a sawi.

Spurs hian Premier League season bul an ṭan fuh a, mahse an league match hnuhnung pahnihah an tlawm. Blues an hmachhawn ṭumin hun chanve hmasa lam chu an khel ṭha viau. Amaherawhchu inkhel chawhnu lamah an zuih - Blues tan Thiago Silva, N'Golo Kante leh Antonio Rudiger ten goal an khung.

Nuno chuan, "Thawhhona ṭha kan neih a ngai, chumi tur chuan inpawh tlang taka thil kan tih tam a ngai. Siamrem ngai kan nei nual a, chumi siamṭha tur chuan ka naute hian theihna an nei. A rang thei ang bera a chinfelna kan hriat a ngai," a ti.

North London club hian zanin dar 12:15 hian League Cup third round khel turin Wolves an tlawh dawn, kar tawpah Arsenal an lenchilh zui dawn avangin player ṭha ṭhenkhat chu an khek a rinawm.