Football zirna inpui Centre of Excellence hawn a ni

Mizoram chhunga football zirna changtlung Centre of Excellence chu nimin tlai khan chief minister Lal Thanhawla'n a hawng.

Football academy hi Tata Trusts bun tum niin Mizoram sorkar, Mizoram Football Association (MFA), Mizoram Police leh Aizawl Diocesan Education Society (ADES) te nen ṭangkawpin an din a ni.

Kum nga atan
Centre of Excellence hi 3rd MAP campus Mualpuiah a awm a, kum hnih chhung atan Mizoram Police leh Tata Trusts ten inremna an nei a, nimin khan Mizoram chief minister Lal Thanhawla chuan kum nga chhung awm an phalsak tur thu a puang.

Chief minister chuan Mizoramin football-a hmasawnna nasa tak a awm avangin MFA hmalakna a fak.

Nimin academy hawnnaah hian Tata Trusts CFO leh company secretary Burzis S. Taraporevala, ADES secretary Fr. Santiago Savari, Tata Trusts zonal head Biswanath Sinha, MFA president Lal Thanzara leh DGP Balaji Srivastava-ten thu an sawi.

Coach atan Toal
COE head coach tur chu British mi Colm Toal a ni a, AIFF technical director hlui hian May hian a hna a thawk ṭan ang. CoE hi India Junior coach hlui Bitan Singh leh MPL club Chanmari FC leh Dinthar FC coach hlui Lalchhuanawma (L.Ch-a) te kaihhruaina hnuaiah kalpui ṭan a ni tawh a, anni pahnih hi Toal-a puitu turte an ni.

North East huap a nih angin academy-a awm tur hian India hmarchhak state hrang hrang aṭangin naupang 25 an la a, Mizoramin naupang 16 an thawh a, Manipur leh Assam (Bodoland) ten naupang pali ve ve thawhin Nagaland aṭangin pakhat lak a ni bawk.

Tun leh nakin?
COE din a nih theih nan Mizorama football thuneitu sang ber MFA leh Mizoram Police te an thawh hlawk a, kawng engkimah Tata Trusts te hi hma an lakpui. MFA-in pa chan changin ruahhmanna an siampui a, Police-in phal takin an campus-a building an hmantir bawk.

Ruahman dan chuan COE hi hei aia lian zawka kalpui zel tum a ni a, MFA nena an thawh dun avangin Sairang Dinthar-a MFA ground peihfel a nih hunah COE hi player ṭhahnem zawk awm theihna tur chu Tata Trusts lam hmathlir a ni.