Lalremsiami telna India hockey team vanduai

Mizo nula Lalremsiami telna India hmeichhe hockey team chu Commonwealth Games-ah final an lut zo lo. India hi Australia lakah si khat faiin an vanduai a, vawiin hian England nen bronze medal an inchuh ang.

Ningania inkhelah champion lai Australia lamin inkhel an thunun zawk a, tun hnaia hmasawn tak India nula ten penalty corner vawi hnih an in chhanhim theih hnuah, quarter thumna khelh laiin penalty corner an chawi leh a, an vannei reng thei bik lo - Australia tan Grace Stewart chuan chakna goal awmchhun khung nan a hmang a ni.

Tun ṭum Commonwealth Games hmeichhe hockey-ah India hian an pool match hmasa berah Wales an ngam lo a, mahse Malaysia leh England hnehin semifinal an lut. Bronze medal an chuhpui tur England hi 2-1 in an hneh tawh a, hei vang hian India nulate tan medal beiseina a la tawp lo.

Kolasib tleirawl duhawm Siami hi India squad-ah chuan a naupang ber a ni a, kum 17 mi Siami hian Malaysia an hneh ṭumin goal khat a khung a ni. Thenzawl Women Hockey Training Centre aṭanga zir chhuak Siami hian nikum khan India tan Aisa Cup a chawi tawh a, ram tan a fehchhuahin player pawimawh leh langsar a ni phak ṭhin.