City harsatna belhchhah theitu Spurs

Manchester City-in match thum chhung a zawna an khingpui an hneh loh hnuah zanin dar 12:15 hian Wembley Stadium-ah Tottenham Hotspur an lenchilh dawn. Premier League team ṭha pahnih inkhel hian nomawi kalkawngah nghawng nei lo mah se team boruak siam ṭhatna atan a pawimawh takzet.

City hmabak
Liverpool-in Anfield-ah City an hneh a, Jurgen Klopp-a hoten vawi khat duh tawk loin Etihad Stadium-ah an hneh leh bawk. Man City neituten Pep Guardiola an rawih chhan ber nia lang chu Champions League nomawi a ni a, chuti ni lo se Spanish manager hmaa team enkawltu Manuel Pellegrini pawhin league nomawi a chawipui a, League Cup nomawi phei chu ṭum hnih a chawipui.

Pep-a hi coach hlawhchham tia sawi a rem lo a, beisei pha lo erawh a tih theih. A chhan chu Spanish manager hian Bayern Munich season thum a enkawl chhungin vawi khat pawh Champions League final a thlenpui lo a, City-ah season hnih chhungin semifinal a thleng lo ve ve bawk.

Barcelona manager hlui Pep-a'n nomawi lak theih zinga hlu lo ber League Cup a champion tawh a, tuna a hna tur chu an khelh hmabak thunun chunga English club tana nomawi hlu ber Premier League champion a ni. Amaherawhchu City-in an hmelma Manchester United hneh chunga champion theihna hun ṭha an bawhpelh avangin champion hun sawn hlat a ni a, Spurs an hneh an nih pawhin champion nemnghet tur chuan Swansea City an hneh leh phawt a ṭul ang.

Spurs vul lai
Tottenham Hotspur hian Europe-a City hnehtu Reds nena an inhnehtawk hnuah league match bikah an khingpui vawi sarih an hneh leh tawh a, an hneh zingah hian London club pahnih Arsenal leh Chelsea pawh an tel a. Pep-a hoten an chet chhiat lai taka Mauricio Pochettino hote an hmachhawn tur hi an vanduaiah a ngaih theih hial.

Spurs striker Harry Kane a dam tawh a, Stoke City nena Christian Eriksen-a freekick chu ennawn a nih hnua English striker goal khung anga pawm a nih leh tawh bawk avangin Moh-amed Salah nena an inthlauhna chu goal li chauh a ni. Argentine manager Poch-a chuan, "Goal thutlukna chungchang an sawi zui leh danah Kane a hnual a, amaherawhchu hei chu thil thlen ṭhin dan a ni a, thil tam tak a zir phah ang," tiin tun hnaia thil thleng chungchang a sawi.

Player ṭha bik tam tak hi sawisel an hlawh chiah hian a hma aia ṭhain an rawn inlan ṭhin a, City leh Spurs inkhel turah pawh hian Kane-a'n en bik a hlawh dawn a, Reds sut pawp tawh a pal darh nawn a nih pawhin a mak lo ang. Tun dinhmuna Tottenham beisei theih sang ber chu Champions League khelh a ni a, match ruk khelh turah Chelsea aiin point 10-in an hmu tam zawk a, season tawpa pressure neih loh nan dinhmun sawhngheh vat an duh ang.