Tyson Fury a lo kir dawn ta

"Heavyweight-ah chuan eng pawh lo thleng rawh se, tunah chuan khawvelin he huang lam hi a hawi leh tawh ang," tiin Tyson Fury chuan boxing khawvela a kir tur thu a puang a, British boxer-in bengchhen a tum hle.

Kum 29 mi boxer hian June 9-ah ring chhung a rap leh tawh dawn a, a khingpui tur erawh puan zar a la ni lo thung. Fury chuan, "Heavyweight boxing chawi nungtu chu keimah hi ka ni a, mipuiin Achilles (greek pasalṭha) hmuh an duh a, tunah chuan a lo kir ta," a ti.

Fury hian November 2015 khan IBF, WBA leh WBO heavyweight champion ni turin Wladimir Klitschko chu a hneh a, Ukrainian boxer ropui a hneh hnuah erawh a inlan leh tawh lo–tunah a lo kir leh ta.

Engvang nge?
Fury hian October 2016 khan WBO leh WBA world heavyweight title-a kawl lai chu rilru lam buaina a tawh avangin a kalsan a, ring chhung aiin a mimal hriselna a ngai pawimawh zawk.

Ni khat a liam hman chauh tihah British Boxing Board of Control chuan Fury hi damdawi hman phal loh a hman avanga an hrem thu an puang ve lehnghal a, British boxer hian a 'Sanghal' sa ei vang a nih thu a sawi thung.

December khan Fury hian UK Anti-Doping-in an lo hrem tawhna chu a pawm bawk a, January khan a licence chu tihnun thar leh niin tunah chuan promoter Frank Warren nen an thawkdun dawn ta.

Joshua nen maw?
Fury chawlh hlanin Joshua-a'n IBF, IBO, WBA leh WBO world heavyweight kawnghren a kawl vek a, March 31-a Joseph Parker a hneh ṭumin Joshua hian, "Wilder emaw Fury hmachhawn ka duh," tiin a sawi a, Fury nena an inhnek hi khawvel hmuh châk a ni.

Boxing analyst Steve Bunce chuan, "Joshua inhnek kan en zawh apiangin Fury chu ni se result a danglam ang em? tih zawhna hi kan inpe fo. Buaina erawh boxer pahnih hi an inhmachhawn a nih chuan anmahni dawl zo tur stadium a awm kher ang em? Wembley-ah awlsam takin 90,000 chu an kal mai ang," a ti.

WBA chuan Joshua hi Alexander Povetkin nen inhmachhawn turin an titawh a, mah se British boxer hian WBC champion ni lai Deontay Wilder hmachhawn a duh thu a sawi tawh.

Hei le Tyson
Tyson Fury chuan, "Pawisa leh title vel khan min hnem zo lo a, ka chhungte bula hun hlimawm hman kha ka duh ber chu a ni. Mahse, tunah chuan lo kir turin ka inpeih leh ta a, ka 'ta' chu nei let leh turin ka bei dawn a ni," tiin champion kawnghren a thlir nghal.

Vawi 25 inhnek a hmachhawna hnehna chang vektu boxer chuan, "Kg 117-a rit ka ni hman a, tun ka dinhmuna lo kir leh tur ringawt pawh hian beih fe a ngai. Ka in fit em em a, ka tha hi a za a, hei ringawt pawh hi ka tan chuan hnathawh ropui tak a ni tawh.

"Damdawi ngawlvei, zu ngawlvei, rilru lam buaina nei, inchhungkhura harsatna tawk–heng mite zawng zawng tan hian ka rawn ding dawn a, harsatna tawkte tan ka rawn pen dawn a ni," tiin amah ang thoa harsatna tawk tawhte tan talchhuahna a awm tih pholan a tum thu a sawi.