Arsenal-in semifinal an lut

Arsene Wenger-a enkawl Arsenal chuan CSKA Moscow mualah hnehna chang zo lo mah se, inkhel hmasa nena belhkhawmin 6-3 in an chak - Gunners hian 2008-09 season hnua a vawi khat nan European football-ah semifinal an lut.

Ningani zan Europa League quarterfinal inkhelah Arsenal hi CSKA Moscow nen 2-2 in an inhnehtawk a, Danny Welbeck leh Aaron Ramsey ten goal an khung. Gunners rual hian RB Salzburg, Marseille leh Atletico Madrid te pawh a thiam pali zingah an inhlangkai ve bawk.

Goal hnih
Emirates Stadium-ah Arse­nal-in 4-1 in hnehna an chang tawh a, inrintawkna sang tak nen Russia an pan. Moscow-a inkhelah an beisei ang ngawtin thil a awlsam lo, mualneitu lamin Fedor Chalov leh Kirill Nababkin te goal hmangin si hnih faiin hma an hruai a, goal khat an khung belh thei a nih chuan an tlang daih dawn.

Arsenal inkhel a nung tawk lo a, a bik takin tlarhma lam an hriam tawk lo bawk, mi­nute 70 thleng chuan goal hlauh­awm an nei hleithei lo. Defender Laurent Koscielny-a'n a hun ṭha neih a hlah hnuah, minute 75-naah striker Welbeck chuan an si phurh sutin, hun tawp hma chiahin midfielder Aaron Ramsey chuan an chak nemnghehna a khung bawk.

Nomawi?
Arsene Wenger-a'n Arsenal a enkawl hnuah Europe-ah nomawi a la chawi lo a, Champions League final chu vawi khat lut ve mah se an la champion lo. Kuminah chuan Wenger-a'n inelna a ngai pawimawh takzet tih a chiang, Premier League lama a hahchawlhtir Mesut Ozil, Ramsey leh Jack Wilshere te chuan inkhel bul an ṭan vek a ni.

Wenger chuan, "Inkhel tir lamah kha chuan kan talbuai lek lek, goal khat kan neih hnuah kan insiamṭha thei chauh. Tlarhnunga player panga kan rem chinah kan nghet sawt a, engtiklai pawha goal khung thei reng mai player kan nei kha kan vannei hle," tiin quarterfinal inkhel pahniha goal khungtu Ramsey leh tun hnaia khel ṭha tak Welbeck te a fak.

Atletico an tlang
Inkhel ṭan hmain Atletico Madrid manager Diego Sime­one chuan, Fernando Torres thlah nana ṭha ber chu Europa League nomawi chawi a nih thu a sawi a, an duhthusam thlen diktir turin kawng dik an zawh mek.

Spanish club-in an mualah si hnih faiin hnehna an chang tawh a, semifinal lut tur chuan goal venhim a tawk tih hre chungin Sporting Lisbon khelmualah an lenglut. Portuguese club lamin Fredy Montero hmangin goal khat khung mah se an mamawh ang an khung belh thei lo.

Kum 2010 leh 2012 Europa League champion Atletico manager Simone chuan, "Eng inkhel mah hi a awlsam lo. Goal hnih khung theihna hun ṭha nei mah ila kan vannei lo a, semifinal lut tur khan vanneihna kan mamawh tel a ni," tiin a sawi.

Atletico Madrid striker Diego Costa chu hliam vangin second half tir lamah lak chhuah a ni a, amah thlaktu Torres leh forward Antoine Griezmann ten Sporting tlarhnung an su hawng thei lo.

Inkhel dangah first leg a hnehna chang tawh Lazio chu khualmualah 4-1 ngawta an tlawm avangin an zinkawng a tawp a, si khat faia hnehna chang tawh RB Leipzig pawh Marseille khelmualah 5-2 in an tlawm ve bawk.