China-ah Vettel tan fiahna
Sebastian Vettel-a'n duhthusama ṭhain season bul a ṭan chho a, Pathianni chawhma dar 11:40-a tlan tur 2018 Chinese Grand Prix hi a tan fiahna lian hmasa a ni ang.
Ferrari driver Vettel tan Shanghai International Circuit hi hmun ṭha a ni lo. Vettel hian Red Bull car a khalh laiin 2010-13 chhung khan world champion a ni zawn thei, mah se khatih hunlai pawh khan China-ah hian hnehna a chang ngai lo, vawi khat chiah podium pawh a lawn phak a ni.
World champion vawi li ni tawh Vettel hian tun season intlansiak hmasa ber Australia Grand Prix-ah Lewis Hamilton hnehin pakhatna a ni a, intlansiak hnuhnung zawk Bahrain Grand Prix-ah khan Mercedes driver pakhat zawk Valtteri Bottas hnehin pakhatna a ni zui leh bawk.
Kum 2004 daih tawh khan Michael Schumacher chuan intlansiak hmasa pahnihah hnehna a chang thei a, hemi hnu hian Ferrari hian kumin anga season bul ṭan ṭhat an la nei ngai lo; Vettel-a'n record hi a rawn nihrual chiah a, khum tur erawh chuan tun hma lama a tih theih ngai loh a tih a ngai thung dawn a ni.
Chinese Grand Prix an tlanna tur Shanghai International Circuit hi kum 2004 khan hawn a ni a, hemi kum aṭang hian Formula 1 intlansiak nan hman zui nghal a ni. Entu mipui 200,000 lenna niin, 5.451 km a thui a ni a, kawng kawi 16 a awm.