Chawlh lak duh Chelsea striker Alvaro Morata

Chelsea striker Alvaro Morata chuan beisei anga season a hman ṭhat loh chhan chu hliam a neih vang niin a sawi a, duhthusama dam ṭha tur chuan chawlh hman hma a duh thu a sawi bawk.

Nikum nipui bazar lai khan Real Madrid aṭangin Blues hian Morata hi an lalut. Spain international hian London club tan inelna hrang hrangah match 41 khelin goal 14 a khung tawh a, hnungzâng na vanga inlan theih loh ṭum a nei fo.

Kum 25 mi Morata chuan, "Kan hnungzâng na a chhuah hma kha chuan ṭha takin ka khel thei a, hliam ka neih hnuah erawh beisei ang ka ni thei ta lo. Kan teammate-te bulah inkhelh ka duh a, Blues tan bakah fans tana inkhelh reng hi ka duh, mahse taksain a tlin loh chang a awm ṭhin," a ti.

Premier League champion Chelsea hi league table-ah pangana an ni mek a, match ruk chiah khelh hmabak an neih tawhah an chunga awm Tottenham chu point 10 zetin an phak lo - palina ni chunga UCL khelh beiseina a chau tawh hle.

Antonio Conte naute hian season an hman ṭhat tawk loh thup mawi nan FA Cup an la beisei a, April 22-ah Southampton nen semifinal an khel ang. Saints nen hian vawiin tlai dar 5:00 hian league match an khel hmasa dawn a ni.