Rawlthar rual nena harsatna nei lo Liverpool

Liverpool boss Jurgen Klopp-a'n 'B Team' tia chhal theih deuhthaw Norwich City khelmualah a khelhtir a, League Cup third round-ah 3-0 in an chak - last 16 an lut.

Merseyside club tan Takumi Minamino chuan tun season-a a match hmasa berah goal hnih a khung a, khel khat ve tak Divock Origi-a'n goal khung dan a la theihnghilh bik lo tih pholangin goal khat a thawh ve bawk.

Mualneitu Norwich beiseina siam turin Christos Tzolis chuan penalty hmangin hun ṭha nei mah se Liverpool keeper Caoimhin Kelleher-a'n a dansak a, Reds-in khualmualah goal an chhuah lo.

Norwich-in an ṭhat dan bera an khelh bik loh avangin chhuanlam tur an nei ṭha a, Liverpool fans tan erawh an rawlthar rual ten an khelh ṭhat bawk avangin lawmna tur hlir a ni - Inrinni zanah league match khel turin Brentford an lenchilh zui ang.

Japan ral lian!
Jurgen Klopp-a'n league match hnuhnung bera Crystal Palace hnehtu team aṭangin player pakua ngawt a thlak danglam a, team pahnih an inthurual emaw tih mai turin Norwich lamin player pakua tho an thlak danglam bawk.

Player siksawi fuh zawk erawh minute linaah a lang nghal a, Klopp-a'n tun season-a a vawi khat nana a khelhtir Minamino chuan ngaihthah a thiang lo tih a pholang a, Origi siamsak chu ṭha zeta a inherpui hnuin goal-ah a chantir.

Norwich-in goal an chhuah hnuah na takin Liverpool an nawr zui a, mahse, Adam Idah chuan holam takin a hun ṭha a hlah a, Tzolis-a penalty lah Kelleher chuan ṭha zetin a dansak bawk - Pierre Lees-Melou chance duhawm hlah pawh uiawm tak a ni.

Minute 50-naah Liverpool tan Origi a rawn inlar a, Konstantinos Tsimikas ball cross chu Belgian striker hian goal khung a la thiam reng tih pholangin a tauh lut.

Minamino bawk chu
Norwich-in an hun ṭha neih an chhawr thei lo a, Liverpool player-ten tlarhma lamah an 'class' an pholang ṭhin thung - hun tawp nan minute 10 chauh a awm tawh tihah Minamino a inlar leh a, Alex Oxlade-Chamberlain-a siamsak chu Norwich defender ven karah ṭha taka lalutin goal-ah a chantir.

Mualneitu lamin a chhanna tur an nei lo a, hun a tawp meuh chuan a tir lamah team pahnih intum tawk viau mah se 3-0 in Liverpool an chak a, a tawpa sawi hlawh ber chu Minamino a ni.

Minamino hi October 2019-a Liverpool-in Red Bull Salzburg an mikhual ṭum khan Austrian club tan a la khel a, goal a khung piahlamah a khel ṭha takzet - an khingpui player-te meuh pawhin thiam an ti a, Klopp-a hnenah lei turin an ngen.

Klopp-a'n a player-te duhna ngaithlain January 2020 khan pound maktaduai 7.25 in a lalut a, mahse, Japanese forward hian insiamrem turin hun a duh rei hle - season hmasa tawp lam phei chu Southampton-ah loan-a kaltir a ni a, tun season-a a match hmasa berah goal hnih a khung nghal avangin Reds fan-ten beiseina an nei sang ang.

Rawlthar beiseina
Norwich khelmualah Liverpool player langsar tam zawk hmuh tur an awm lo a, Mohamed Salah, Sadio Mane, Virgil van Dijk, Joel Matip, Trent Alexander-Arnold leh Alisson Becker-te chu squad-ah takngial pawh an awm lo.

Klopp-a'n Liverpool tlarhnung laiah la inkawp ngai lo Ibrahima Konaté leh Joe Gomez a inkawptir a, Gomez-a'n captain armband a hreng. Season duhawm tak hmangtu Konstantinos Tsimikas leh rawlthar Conor Bradley ten an dinpui.

Kum 18 mi Bradley-a'n Liverpool tana a match hmasa ber a khel a, Reds tan a vawi khat inlanna chauh ni mah se May thla khan Northern Ireland senior team tan a match hmasa ber a lo khel daih tawh.

September 2019 khan an ram club Dungannon United aṭangin United hi a zawm a, Liverpool Under 23 leh U18 tan a hun tam zawk a hmang a, pre-season tour an neih khan Austria-ah senior team training a zawm a, tunah chuan senior team tan a inlan ta.

Beiseina Gordon
Kum 16 mi Kaide Gordon-a'n tlarhmaah Origi leh Minamino a rawn kawp a, a kum ngaihtuahin a zahpuiawm lo hle - February 2021 khan Derby County aṭangin Liverpool a zawm a, Reds hian pound maktaduai thum thlenga a man sang chho thei turin inremna an neihpui.

Championship lama Derby tana match khat lo khel ve tawh Gordon khelh dan enin Reds fans lung a awi ang tih a chiang a, goal khungna remchang a nei hial. Hliam tenau neih vangin Naby Keita lakchhuah a ni a, a thlaktu Tyler Morton pawhin Reds tana a match hmasa ber a khel ve chauh.

Kum 18 mi midfielder hi Liverpool academy chhuak a ni a, Merseyside club rawlthar duhawmte khelh dan enin Liverpool hma hun a êng hle - Harvey Elliott (kum 18), Curtis Jones (20), Trent (22), Konaté (22) leh Kelleher (22) te kum la naupanzia theihnghilh loh a ṭha.

Liverpool boss Jurgen Klopp chuan, "Naupangte khan an khel ṭha hle - player pathumte khan tharum an ngah em em a, hun tawp thleng an khel thei vek kha thilmak ber a ni hial zawk. Hun duhawm tak an tawng a, ka lawmpui a ni," tiin a sawi.