Sum lalut tam ber Ronaldo

American business magazine lar Forbes chuan footballer sum lalut tam hming a tarchhuak a, kum 2021 chhunga sum lalut tam ber chu Cristiano Ronaldo a ni. Portugal captain leh a hnuai chiaha awm Lionel Messi te sum lak belhkhawm chu dollar maktaduai 235 tehmeuh a ni a, player pahnih hi an kum a upa tawh chungin an sum lakluh aṭang hian an ropuizia a hriat theih.

Kum 36 mi Ronaldo hi season liam ta khan Juventus tan khelin Serie A-ah top scorer a ni a, European Championship-ah top scorer ni leh bawkin a club hlui Manchester United-ah a let. September thlatir khan Ronaldo chuan ram tana goal khung tam ber record a siam a, Portugal tan goal 111 a khung tawh.

Ronaldo hian chhiah pek hmain dollar tluklehdingawn khat a lalut tawh a, infiammi zinga hetiang dinhmun kai thei hmasa ber a ni. Portugal captain hian Messi aiin hlawh tam lo mah se fakna lamah a lalut tam zawk a, Forbes-in a chhut danin season khat chhungin dollar maktaduai 125 a lalut.

Ballon d'Or vawi ruk zet dawng tawhtu Messi hi footballer hlawh tam ber a ni a, hlawh aṭang record-a a sum lakluh hi dollar maktaduai 875 a tling tawh a, fakna aṭangin dollar maktaduai 350 la tawh bawkin dollar tluklehdingawn khat aia tam chu a lalut tawh. Messi hian PSG zawmin dollar maktaduai 75 a hlawh a, khawvela hlawm tam ber ni mah se fakna lamah Ronaldo a pha lo.

Sum lalut hnem 10 zingah Neymar, Kylian Mbappe, Mohamed Salah, Robert Lewandowski, Andres Iniesta, Paul Pobga, Gareth Bale leh Eden Hazard te an lang pha bawk. Kum 2018-a Barcelona chhuahsana Japanese club zawmtu Iniesta hi kum 37 mi ni tawh mah se Vissel Kobe-ah a hlawh tam avangin paruknaah an la awm thei a ni.

Real Madrid pawhin player pahnih an thawh a, Gareth Bale leh Eden Hazard te an thawh. Tottenham leh Chelsea aṭanga Los Blancos zawmtu player pahnih hi hliamin a tihbuai ve reng avangin khelmualah an hlawh phu tawkin an khel chhuak lo.