Man City manager ka ni hi ka inchhuang - Guardiola

Spanish manager Pep Guardiola-a'n club ṭantute chungah ngaihdam a dil loh tur thu a sawi hnuin, Manchester City manager a nih avanga a inchhuan thu a sawi.

Thawhlehni zan khan Man City hian League Cup-ah Wycombe Wanderers chu 6-1 in an sawp a, Premier League club tan an academy player-te an che ṭha hle. Man City hian hnehna an chan avangin League Cup bikah October 2016 aṭang khan hneh loh an tawng tawh lo a, an record hi ropui tak a ni.

Etihad Stadium-a inkhelah Wycombe-in minute 22-na lekah Brandon Hanlan hmangin an khung hmasa a, Man City insiamrem hnuah erawh Championship club tan City an ṭha mah mah.

Man City hian season hnuhnung pariatah league cup vawi ruk an chawi thei a, Wycombe lakah hian academy player luhtir bawk mah se player ṭha nen an inchawhpawlh ṭha hle.

Minute 29-naah Kevin de Bruyne-a'n goal ṭha bik a khung a, Raheem Sterling leh Riyad Mahrez ten goal ban an pet per ve ve hnuah Mahrez-a'n minute 42-naah hmahruaina a khung.

First half injury time-ah Foden-a'n box pawn aṭangin kawh zetin a pet goal a, Ferran Torres-a'n minute 71-naah goal lina a khung. Man City-in inkhel an thunun a, Mahrez-a'n minute 83-naah goal ngana a khung.

Goal rukna hi substitute Cole Palmer a khung a ni a, kum 19 mi English midfielder hian halfway thlen hma aṭanga khalh ṭanin box pawn aṭangin goal kilah tak a pet lut.

Manchester City manager Pep Guardiola chuan, "Academy player-te avangin ka lawm takzet. Player pahnih khat ṭha an awm a ni ringawt lo a, player ṭha ṭhahnem tak an awm a, an chungah rinna kan nghat thei ang. Thiamna leh chak duhna an nei a, he club manager ka ni thei hi ka inchuang a ni," tiin a sawi.

City academy player Conrad Egan-Riley, Luke Mbete, Finley Burns, Josh Wilson-Esbrand leh Romeo Lavia te a vawi khat nan senior team-ah an inlan. Lavia hi defensive mifielder niin player dang pali hi defender an ni a, Man City tlarhnunga bul ṭante hi academy player vek an ni.

Man City hian September 25, Inrinni zan hian Premier League hmahruaitu Chelsea hmachhawn turin Stamford Bridge an tlawh dawn a, Pep Guardiola hote tan fiahna hun a ni ang.

Kar liam ta khan Man City hi Southampton-in goal awm loin an chelh tawh a, season ṭantirhah Tottenham-in 1-0 a an hneh tawh bawk avangin Pep-a leh a hote tan chetsual a thiang tawh lo.