Run hnihin Rajasthan an chak

Thawhlehni zan Indian Premier League inkhelah Rajasthan Royals chuan 2 runs-in Punjab Kings an hneh. Zanin hian champion lai Mumbai Indians leh Kolkata Knight Riders te Sheikh Zayed Stadium, Abu Dhabi-ah an inkhel ang.

Dubai International Stadium-a inkhelah Punjab-in vawm hmasak an thlang. Rajasthan Royals tan top order-te an che ṭha a; Evin Lewis (36), Yashasvi Jaiswal (49), Liam Livingstone (25) leh Mahipal Lomror (43) te zarah 185 runs an vaw chhuak.

Punjab opener KL Rahul (49) leh Mayank Agarwal (67) te an chet ṭhat avangin ball tawpna ber thlengin chak tur zawk a chiang lo. Over 19 zawhah Punjab-in 182/2 runs an siam a, chak turin 4 runs chiah an mamawh tawh.

Rajasthan-in over tawp ber vawm turin Kartik Tyagi an rawn chhawp chhuak a, Uttar Pradesh fast bowler hian hnehna a rawn chanpui. Kum 20 mi Tyagi hian ball hmasa pahnihah run khat chauh a pe a, ball thumnaah Nicholas Pooran a vawm hlum.

Ball thum la awmah Punjab tan 3 runs siam a ngai a, harsa tur niin a lang lo. Mahse Tyagi a che ṭha chhunzawm a, run a pek tawh loh bakah Deepak Hooda vawm hlum lehin Punjab Kings-in over 20-ah 183/4 runs an siam a, run hnihin target an pha lo.Rajasthan Royals chakpuitu Tyagi hi man of the match-a thlan a ni.