Ngaiawh a la harsa - Marquez

Marc Marquez chuan tun hnai MotoGP inelna a hmachhawn hnuhnung pahnih a hmachhawn danah a lungawi thu a sawi a, chutih rualin tun hma anga hneh sawh taka hnehna chang leh tur chuan hmabak a la ngah thu a sawi.

Aragon GP-ah Marquez hi pahnihna niin, intlansiak hnuhnung ber Misano MotoGP-ah khan palina dinhmun a luah thung. Season hmasa leh kumin kum tir lam thleng kha hliam vanga inelna hmachhawn thei lo kha a ni a, tunah chuan hma a sawn leh tawh hle.

Spanish rider Marquez chuan, "Pahnihna ka nih hnuah palina ka ni leh a, chanchin lawmawm tak a ni. A nihna takah chuan palina ka nih ṭum khan nasa takin ka tlan ṭha zawk, ka taksa, bike leh engkim mai kha duh angin a kal.

"Amaherawhchu, hun rei tak inelna ka hmachhawn mumal loh avangin ngaiawh leh a harsa a, a ṭha ber ni leh tur chuan hun ka mamawh. A bik takin ding lam zawnga kawng kawi tama tlan kawngah hmasawn ka la mamawh zual," tiin a sawi.

Bike intlansiakna sang ber MotoGP hi October 3 hian Red Bull Grand Prix of the Americas-ah an tlan leh dawn. Season tira calendar siamsa a awm Japanese GP erawh hri leng vangin an tlan thei dawn ta lo.