Europe-a goal khung tam ber Lewandowski

Thawhlehni zan khan Robert Lewan-dowski hnenah 2021 European Golden Shoe chawimawina hlan a ni. Bayern Munich striker Lewy hian 2020-21 season khan goal 41 a khung a, La Liga top scorer Lionel Messi (30) leh Serie A top scorer Cristiano Ronaldo (29) te chungah a awm.

Lewy a ropui
Bavarians striker Lewandowski hian Bundesliga record thar a siam a, match 29-ah goal 41 khung. Gerd Muller-a'n 1971–72 season khan match 34-ah goal 40 a khung a, season khata Bundesliga-a goal khung tam ber record chu kum 49 hnuah a khum.

Kum 33 mi Lewy hi khawvela striker ṭha ber zinga mi ni mah se Golden Shoe hi a vawi khat dawnna chauh a ni. Polish striker hian 2019–20 season khan goal 34 a khung a, Lazio forward Ciro Immobile-a'n goal 36 a khung avangin a dawng lo chiah chiah.

Bundesliga-ah hian season khatah match 34 chauh khelh tur a awm avangin German league aṭanga dawn hi a harsa a, Lewy hi Gerd Muller hnua Bundesliga aṭanga Golden Shoe dawng thei hmasa ber a ni.

Bayern striker Lewy chuan, "Ka lawm takzet a, he chawimawina hi ka chhuang bawk. Goal 41 ka khung ṭum khan record siam theih loh mai inrin lai ka nei a, chu chu ka inhliam laiin a ni. Ka dam hnuah erawh a êng zawngin ka thlir a, goal 41 khung ngei kha ka tum," tiin a sawi a, inhliam vangin league match vawi nga ngawt a khel thei lo.

Polish striker hian a chawimawna dawn hi a chhungte, a khelhpui, coach leh Bayern Munich tan a hlan a, team anga thawhhona rah a nih thu a sawi bawk.

Hmabak Ballon d'Or?
Lewandowski chet ṭhat ber season erawh 2019–20 season kha a ni a, Bayern Munich-in Hansi Flick hnuaiah Bundesliga, DFB Pokal leh Champions League an chawi a, UEFA Super Cup leh FIFA Club World Cup nomawi an chawi leh bawk.

Bayern striker hi Ballon d'Or dawng ngei tura ngaih ni mah se Covid-19 vangin mimal chawimawina ngaihhlut ber hi sem a ni lo. Chutihrualin Polish striker hnenah hian Best FIFA Men's Player leh UEFA Men's Player of the Year hlan a ni tho.

Tun season-ah pawh Lewy hi a la che ṭha a, league match nga aṭangin goal sarih a khung tawh a, Champions League-ah pawh Barcelona chauh an la hmachhawn chungin goal hnih a khung der tawh.

Kum khat an awl hnuah kumin hian Ballon d'Or an sem ngei tura ngaih a ni a, Lewy hi a dawng tura beiseiawm zingah a tel dawn. Amaherawhchu a elpui tur hi Copa America-a Argentina champion puitu Lionel Messi-te an nih dawn avangin a awlsam dawn lo.

Golden Shoe
European Golden Shoe hi European Golden Boot tih a ni bawk a, season khat chhunga Europe league hrang hranga goal khung tam ber hnenah an hlan ṭhin. Chawimawina hi 1967–68 season aṭanga pek ṭan a ni a, a tirah chuan 'Soulier d'Or' tih a ni a, 'Golden Shoe/Boot' tihna a ni.

Kum 1997 aṭang khan kalphung an thlak a, league dinhmun a zirin point pek ṭhin a ni. UEFA ranking-a league sang panga a mite goal khung zat chu pahnih (2) a puntir a ni a, league sanga parukna aṭanga 22-na chu 1.5 a puntir a ni a, a dang zawng chu pakhat (1) a puntir a ni thung.

A awmzia chu Norway-a football league Eliteserien chu ranking-ah 22-na chauh a ni a, top scorer Bodo striker Kasper Junker-a'n goal 27 khung mah se an league hi 1.5 hmanga puntir tur a nih avangin a point hmuh zat chu 40.5 chauh a ni.

Hetihlai hian Lewandowski (41), Messi (30), Ronaldo (29), Kylian Mbappe (27) leh Harry Kane (23) te chu an league khelhna 2-a puntir tur a nih avangin an point hmuh zat hi 82, 60, 58, 54 leh 46 a ni thung.