FIFA Futsal World Cup Brazil captain-in nomawi a duh

Brazil captain Rodrigo Hardy chuan FIFA Futsal World Cup nomawi an chawi theihna tur a nih chuan a nunna hial hlan a phal thu a sawi. Selecao hian group stage-ah an khingpui Vietnam (9-1), Czech Republic (4-0) leh Panama (5-1) te hnehin last 16 an lut a, champion rinkai zinga mi an ni.

Rodrigo hi kum 37 mi a ni tawh a, futsal defender zinga ram tana goal 100 khung thei hmasa ber a ni. Kumin Futsal World Cup-ah pawh hian Brazil captain hian goal hnih a khung tawh. Rodrigo chuan, "Mimal hlawhtlinna hi chu ka ngaih pawimawh ber a ni lo a, chutihrualin FIFA leh CBF-in chawimawina min pek erawh ka ngaihlu hle," tiin a sawi.

Champion ngei an tum thu sawiin Rodrigo chuan, "World Cup champion nana a ṭul a nih phawt chuan ka nunna pawh ka hlan phal. Ka thinlung hi nomawi nena thleng a ṭul a nih chuan ka thleng mai ang. Futsal hian nasa takin hma a sawn a, kan rama futsal-in hma a sawn zel theih nan nomawi hi kan mamawh a ni," tiin a sawi.

Lithuania-a neih FIFA Futsal World Cup vawi kuana last 16 chu zaninah khelh chhunzawm a ni dawn a, zanin dar 10:30 hian Brazil-in Japan an hmachhawn ang. Inkhel hi Facebook Page 'Kemari Sports' ah a en theih. Zan dar 8:00-ah Argentina leh Paraguay bakah Kazakhstan leh Thailand te an inkhel bawk ang.