Barcelona: Laporta vs Koeman - an buai zual zel!

Sum vanga Barcelona buaizia inhrilh nawn kan ngai tawh lo a, Catalan club ni lo, club dang tana khel thei tur pawha ngaih ni ngai lo Lionel Messi meuh pawh an chhuah.

Transfer tawp niah Antoine Griezmann pawh chhuahtir a ni a, French forward hian tunah chuan a club hlui Atletico Madrid lamah hun a hmang leh daih tawh.

Barcelona president inchuh boruak a san lai khan Joan Laporta-a'n a thlak tak Josep Maria Bartomeu hnuaia lungawi lo Messi a chelh tur thu a sawi a, Ronald Koeman chu a ruahmannaah a tel loh thu a sawi bawk.

Mahse, President a nih meuh chuan Messi a chhuak a, Koeman a la cham reng bawk - Laporta hi Koeman-a fan a ni lo tih chu a chiang a, tun hnaiah boruak an nei dun viau bawk. Zawhna awm erawh Dutch coach ban thei dinhmunah Barca an ding em, tih chu a ni.

Kan duh lo che!
Season ṭan a nih hma khan Laporta leh Koeman an inhmu a, Laporta hian Dutch coach hnenah hian an chhawr chhunzawm zel dawn leh dawn loh chungchanga ni 14 nghak turin a ngen.

Koeman chunga Laporta chet dan hi coach mahni induh tawk ve tak tan chuan thil 'na' tak a ni a, "Nang aia ṭha kan zawng phawt ang a, kan hmuh loh chuan kan inruai zel dawn nia," tih ang vel a ni. Koeman-a'n a nghak a, a agent Rob Jansen a lawm lo.

Rob Jansen chuan, "Nupui atan ka duh che a, mahse, kar hnih tal min nghak rawh. Kar hnih chhunga nang aia ṭha ka hmuh loh chuan kan innei dawn nia, tih ang chauh a ni," a ti a, a sawifiah thiam hle.

Laporta hian mi tam takin an duh, an club legend Xavi chu coach atan a la ring tawk lo a, a coach duh em em Julian Nagelsmann lah Bayern Munich nen an lo inrem tawh bawk - Koeman aia ṭha a hmu lo a, Dutch coach-ah lungawi a zir.

Mahse maw...
Tun hnaiah mipui vantlang hriat turin Laporta leh Koeman an inbei ta zeuh zeuh a, Dutch coach hian, "Keimah vangin Barca hian hma hun a la nei a ni," a ti hial a, club siamṭhat hna thawk mektu Laporta tan hriat a nuam lo ang.

Laporta hian hmanni lawk khan journalist ṭhenkhat a ko khawm a, Koeman tana a ruahmanna a hrilh - Dutch coach hian Barcelona khelh dan phung, 4-3-3 formation a hman a, Samuel Umtiti leh Riqui Puig a khelh tamtir chuan a contract an pawhsei tur thu a hrilh.

Barca hotupa hian heta an titi hona hi 'thuruk' a nih thu journalist ho hi a hrilh a, mahse, Spanish journalist hmaa 'thuruk' sawi chu hmeichhe ṭhenkhatin, "Ṭhiani, nang chauh ka hrilh ang che," an tih ang chauha rintlak loh a ni.

Spanish media-ten Laporta thusawi an puang zui nghal a, Koeman a awm mai mai thiam tawh lo - Dutch coach hian hun a neih apiangin Barca hotute a bei a, an lakah insum vak a tum lo.

Engvang nge?
Coach-in amah ruaitu a sawisel fo a nih chuan ban mai tur a ni - mahse, Barca hian buaina an nei. Koeman an ban chuan pawisa tam tak an pek a ngai dawn a, coach thar rawih nan sum tam tak sen belh a ngai dawn bawk.

Barca-in pawisa an nei miau lo a, Koeman an ban thei lo - Dutch coach hian hei hi a hrechiang em em a, Barca thuneitute a chhanglet ngam tlat! Catalan club-in Koeman an rim lai khan Netherlands coach a ni.

Netherlands hian Koeman an kaltir dawn a nih chuan Barca-in euro maktaduai ruk an pek an phut. Mahse, Barca-in coach lei turin pawisa an nei lo. Koeman hian pawisa pein amah a inlei chhuak a, Barca coach a ni.

Mahse, Barca nen inremna an nei - Catalan club-ah kum thum a cham lo a nih chuan Barca-in euro maktaduai ruk hi an pe let tur a ni, tih an ziak. Hei chu thuhran a la ni, a contract zawh hmaa an ban chuan sum pek belh tur dang a la awm ṭeuh bawk.

A buai zual zel
Tun hnai khan Laporta adviser Enric Masip chuan Laporta sawiseltu Koeman hi na takin a lo sawisel ve bawk a, sum mai ni lo, khelmual chhung leh pawn thlengin buainain Barca a kiansan lo a ni ber.

Champions League-ah Barca hian 3-0 in Bayern Munich an ngam lo a, Champions League chanchina a vawi khat nan Barca hian target-ah shot an nei miah lo!

Barca style aia defensive game khelh thlangtu Koeman-a'n tlarhnung ngai pawimawh lo se a aia tam zawk chhuah thei an nih thu a sawi zui a, European football-a rorel ṭhin club tan thu hriat nuam a ni lo ang.

Barca-in La Liga lamah club naran Granada chu minute 90-naa Ronald Araujo goal hmangin an inhnehtawkpui zui a, khua a var lo hle - zanin dar 1:30-ah league match khel turin Cadiz an lenchilh zui dawn a, eng tak ang zel ang maw, tiin football khawvelin Barca a thlir mek.