Suarez-a'n a thiam a la theihnghilh lo

Luis Suarez-a'n inelna hrang hranga a match hnuhnung parukah goal khat chiah a khung a, season hmasa lawka La Liga-a Atletico Madrid champion puitu hian sawiselna a tawk nasa hle.

Mahse, Thawhlehni zanah Suarez-a'n thiltih hmangin amah sawiseltute a chhanglet a, Getafe lakah goal hnih khungin a team a chhanhim - Atletico hi 1-0 in an hnufual reng a, Suarez goal hmangin 2-1 in an chak.

Barcelona aṭanga Atletico Madrid lama a kir hnuah Antoine Griezmann erawhin goal a la khung thei lo chhunzawm zel a, Getafe lakah pawh bul ṭan mah se goal a khung loh avangin sawiselna a tawk zel ang.

Atletico-in hnehna an chan avangin table chung ber an luah a, match rukah point 14 an nei - an hnuai chiaha awm Real Madrid chuan nizan khan Real Mallorca an mikhual a, he thu buatsaih a nih lai hian result kan hre hman lo.

Beisei loh lam
Getafe-in kum 2011 hnuah Atletico lakah goal an la khung leh lo a, hei vang hian Thawhlehni zan an inkhelah pawh Getafe tan beisei a sang lo - mahse, rin loh takin minute 45-naah goal an rawn khung hmasa!

Stefan Mitrovic-a ball tauh chuan post per zet mah se a per lehlam hian Atletico keeper ṭha mi Jan Oblak-a kut a per a, a per lehlam hi goal-ah a lut daih - Atletico an hawihai.

Getafe-in Atletico nena an intawn hnuhnung vawi 20-a goal an khung hmasak ber a ni a, Diego Simeone-a naute an hmachhawn hmaa league match ngaa chak nei miah lo team hian champion lai lakah beiseina an nei hman.

Minute 70 a pel tawh a, Getafe an ṭang tlang thei mai dawnin a lang hman. Mahse, midfielder Carles Alená chu Atletico forward Matheus Cunha laka hlauhawm taka a chet avangin hnawhchhuah a ni a, mikhual team-in beiseina an nei thar.

Hei le Suarez
Alena hnawhchhuah a nih aṭanga minute li hnu lawkah Atletico-in player tam zawk an nih an chhawr nghal a, Luis Suarez chuan Mario Hermoso ball pek ṭha zet chu mawi zetin goal-ah a chantir - mahse, Atletico tan draw result mai chu a la tawk lo.

Minute 90-na a ni tawh a, Suarez bawk kan hmu nawn. Croatian full back Sime Vrsaljko siamsak chu a tauh lut a, hun rei zawk a hnufual zawka awm team kha hun a tawp meuh chuan an chak daih!

Kum 34 mi Suarez chuan, "Top level-a inkhel ṭhin player chuan sawiselna kan tawh fo a ṭul a, mahse, kei chu ka beidawng ve ngai lo. Sawiselna avang mai mai hian ka tlawm ngai lo ang.

"A pawimawh berah chuan game-a thil thlen danah khan ka lawm a, result kan thlak danglam thei khan min tilawm takzet. Kan tihsual tam tak chu kan siamrem a la ngai a, mahse, season tir chauh a la nih avangin hma kan sawn zel ang," a ti a, a phur hle.