Champion Inter Milan an chak zel

Serie A champion Inter Milan chuan team ṭha an la ni reng tih an lantir nawn a, an mikhualna ramah Fiorentina chu 3-1 in an luhchhuah. Match nga an khelh aṭanga point 13 hmuin league hmahruaitu an ni lailawk.

Thawhlehni zan inkhel dangah Atalanta pawhin an mikhual Sassuolo 2-1 in an hneh. Atalanta hian duhthusama ṭhain season bul ṭan lo mah se an insiamrem chho leh tawh a, champion an tum ngam lo a nih pawhin a sang pali zinga tel turin an la ṭha tawk tura ngaih a ni.

Inter an chak
Stadio Artemino Franchi-ah season hmang ṭha pahnih an intawng a, mualneitu hi a zawna vawi thum chak thei an ni - mahse hliam vangin Gaetano Castrovilli, Erick Pulgar leh Lorenzo Venuti te an chhawr thei lo.

Inter pawhin Joaquin Correa, Stefano Sensi leh Arturo Vidal te an chhawr thei bik lo a, mahse an match hnuhnungah Bologna 6-1 ngawta an sawp theih avangin inrintawkna an neih san vanglai tak a ni.

Minute 23-naah winger Riccardo Sottil hmangin goal hmahruai an khung, chawlhlawk hmain goal dang a lut zui lo. Second half-ah erawh Inter lamin Matteo Darmian leh Edin Dzeko te hmangin an chhang let.

Fiorentina forward Nicolas Gonzalez chu minute 78-naah hnawh chhuah niin, an beiseina a ti zuih. Hun tawp hma deuhin Ivan Perisic chuan Inter goal thumna leh chak nemnghehna ni bawk chu a khung a, khualmualah point thum an hmu.

Beiseina
Inter Milan hian champion puitu manager Antonio Conte an chelh thei lo a, striker ṭha Romelu Lukaku chuan Chelsea a pansan bawk. An mi pawimawh pahnih awm tawh lo mah se tunah chuan an la che ṭha thawkhat, hmatawng an lak thar Dzeko pawhin beisei a nei sang hle.

Dzeko chuan, "Hun chanve hma lamah khan hun ṭha kan bawhpelh nasa, remchang insiam ṭhin mah ila kan hlawhtling thei lo. Goal khat kan chhuah a, a chhan letna kan neih mai loh avang khan a buaithlak hman hle.

"Mahse, second half-ah khan team ṭha leh puitling zawk kan ni tih chu a takin a lang. Kan team-ah theihna nei sang tak tak an awm, an kianga khelh a nuamin hmun ropui pawh min thlenpui theih ngei ka beisei tlat a ni," tiin a sawi.

Nizan khan Napoli leh AC Milan ten match an nei a, hnehna an chang a nih chuan Inter hi pathumnaah tla hniam leh rih theih an ni. Hetih lai hian Juventus erawh table mawngphah lamah an la talbuai ve mek thung.

Atalanta an chak
Gian Piero Gasperini enkawl Atalanta hian season thum chhung chu attacking football hmuhnawm an khel tawh, tun season-ah pawh an hmuhnawm leh dawn. Robin Gosens leh Davide Zappacosta te goal hmangin an mikhual Sassuolo 2-1 in an hneh.

Gasperini chuan, "Sassuolo khan an khel ṭha hle, an che rangin na takin min nawr buai reng thei. A bik takin second half-ah min nawr na zual, chutih rualin a tawp thlenga 2-1 a kan ṭang tluan thei kha a lawmawm takzet.

"Hnehna kan chan hian inrintawkna min pek belh ngei dawn, kan team hian eng anga thui nge kan thlen theih tih lantir turin theihtawp kan chhuah chhunzawm zel ang," a ti a, a naute rilru put hmang a dik thu a sawi tel bawk.

Italian Serie A season hnuhnung pathumah Atalanta hi goal khung hnem ber a ni a, league bakah Champions League thlengin an hmuhnawm. Tun kartawp hian champion lai Inter Milan an lenchilh dawn a, inkhel pawimawh bik a ni ang.