Old Trafford-ah Hammers-in phuba an la

West Ham United-in Nilaini zan khan London Stadium luhchhuahtu Manchester United khelmual Old Trafford an luhchhuah a, Manuel Lanzini goal hmangin 1-0 in hnehna an chang. Ole Gunnar Solskjaer-a hote erawh Carabao Cup aṭangin an tla.

David Moyes-a'n Man United manager hna a bansan hnuah a vawi khat nan a club hlui lakah hnehna a chang a, an chakna hmun hi Old Trafford a nih kher avangin a hlu lehzual ang. Hammers tan hian kar tawp inkhela penalty hlahtu Mark Noble-a'n inkhel bul ṭanin captain armband a hreng.

Goal khat a tawk
West Ham-in Old Trafford-a hnehna an chan hnuhnun ber chu kum 2007 daih tawh kha a ni a, Carlos Tevez-a'n chakna goal a khung. Knockout inelnaa Hammers-in Man United an petchhuah hnuhnun ber chu kum 2001 daih tawh kha a ni a, FA Cup inkhelah Paolo di Canio-a'n goal awmchhun a khung.

Kum 20 liam ta ang thoin tun ṭumah pawh hian West Ham tan hnehna chang turin goal khat a tawk a, goal awmchhun hi minute kuana lekah Lanzini-a'n a khung.

Mual vei lamah Ryan Fredericks-a'n Jadon Sancho leh Alex Telles te a paltlang a, Hammers right back hian ṭha zetin Lanzini tan pein Argentine midfielder hian 'cool' zetin a pet goal.

Hun tawp lamah Hammers tan goal khung belhna hun ṭha a awm a, Andriy Yarmolenko, Noble leh Jarrod Bowen ten an hun ṭha neih an hmang ṭangkai lo.

Nomawi a bo
Man United-in Ole Gunnar Solskjaer hnuaiah nomawi an la chawi lo a, Hammers an hneh loh avangin nomawi chawi theih pali zinga pakhat League Cup chu an chan nghal.

Norwegian manager hnuaiah hian Man United-in League Cup semifinal vawi hnih an lut tawh a, tun ṭumah hian an match hmasa berah an chak lo. Solskjaer hian player 11 hlawk a thlak a, keeper Dean Henderson bakah khelhna hmun chang tam lo player-te a luhtir.

Tlarhmaa mal tlat Anthony Martial bakah player man to Sancho leh kartawp inkhela chakna goal khungtu Lingard te tlarhmaah an hlauhawm tawk lo.

Inkhel bul ṭan ṭha lo, Man United-in siphurh sut theihna hun erawh an nei. Juan Mata-a'n crossbar a pet per a, substitute Mason Greenwood-a chance ṭha neih chu keeper Alphonse Areola-a'n ṭha takin a dansak.

Man United tan khelte : Dean Henderson; Diogo Dalot, Eric Bailly, Victor Lindelof, Alex Telles (Anthony Elanga 73'); Nemanja Matic, Donny van de Beek, Juan Mata (Mason Greenwood 62'); Jesse Lingard (Bruno Fernandes 72'), Anthony Martial, Jadon Sancho.

Bul kan ṭan ṭha lo a, kan insiamrem hnuah erawh kan khel ṭha. Shot kan nei a, pressure kan pe ṭha a, kan rilru put hmang a dik a, a tawp kan khar thei lo thung. Match zawng zawng a pawimawh a, chutih rualin player thlan dan aṭangin intuai hriam nan kan hmang tih inhre thei ang. Ka inkhelh lai pawhin League Cup-ah ka champion miah lo a, champion tumin kan bei zel ang. Tun ṭumah erawh player-te chher hriam ṭul kan ti zawk a ni. - Ole Gunnar Solskjaer, Man United manger