World Cup vangin Premier League chawl dawn

Khawvela ennawm ropui ber, tih hiala an sawi ṭhin FIFA World Cup chu nakkumah khelh a ni dawn a, ṭum dang ang lo takin World Cup hi November 21- December 18 inkarah khelh a ni dawn - hei vang hian season thara Premier League khelh dan tur pawh thlak danglam a ni.

Nilaini khan Premier League thuneitute chu an inhmukhawm a, 2022-23 season-ah chuan November 12-a league chawlh an rel a, December 26-ah khelh chhunzawm leh tur a ni ang.

Ruahman ang chuan season pawh kum dang ang lo takin khelh hma tur a ni dawn a, August 6-ah khelh ṭan a ni ang a, kar khata khel rei hretin May 28-ah league a zo bawk ang - player an hah deuh dawn tihna a ni.

Premier League khelh rei a nih dawn chuan FA Cup leh Champions League final, May thlaa khelh ṭhin chu June-ah sawn a ngai dawn tihna a ni. Tun season Premier League hi August 13 khan khelh ṭan a ni a, May 22 thleng khelh tur a ni dawn.

Nilainia inhmuhkhawmah hian Premier League club-te chu season thar atana ruahmanna hi hrilh an ni a, FIFA chuan World Cup khelh tur avang hian club-te chu November 14-a player chhuah zalen turin an hriattir tawh a ni.

November 21- December 18 inkara World Cup khelh hian Premier League round sarih leh Champions League group stage tawp lam match hnih chu a nghawng dawn a, season hmasaa Covid-19 vanga fixture a tawt ang khan fixture a tawt leh deuh dawn tihna a ni ber.

Nipuia khelh ṭhin World Cup hi ṭum dangah chuan nipui laia khelh ṭhin a ni a, mahse, Qatar-ah nipui laiin 50C te a kai ṭhin avangin thlasika khelh tur hian an ruahman a ni.