Juventus an chak ve ta

Serie A nomawi leh Juventus chu thil kalkawp leh inzawm tlat a ni ṭhin. Mahse, tun season zet chu Old Lady tan nomawi sawi ngam chi a la ni lo, league match nga an khelh ve chinah a vawi khat nan hnehna an chang ve ta.

Nilaini zan inkhelah Juve hian goal nei hmasa mah se Spezia lakah 2-1 in an hnufual leh hman, a tawpah erawh Federico Chiesa leh Matthijs de Ligt te goal hmanga chhang letin 3-2 in hnehna an chang hram.

Inkhel dangah AC Milan chuan an mikhual Venezia 2-0 in an hneh. Milan hian point 13 hmuin hmahruaitu Inter Milan nen an point neih a inzat a, champion tumin an inum leh dawn tih a chiang.

Juve an chak
Manager Allegri-a enkawlna hnuaiah Juventus hian an league match hmasa paliah chak an nei lo, point hnih chauh an hmuh avangin tla thei dinhmunah an ding hial - Cristiano Ronaldo chhuahsan team hian sawisel an hlawh nasa hle.

Spezia mualah erawh Moise Kean hmanga goal hmahruai an khung avangin an boruak pawh a zia deuh. Mahse, mualneitu lamin Emmanuel Gyasi hmanga a sut hnuah, second half tir lamah Janis Antiste chuan hmahruai letna goal a khung.

Allegri naute an mualpho leh ngei dawn niin a lang. Amaherawhchu a hunah tak Chiesa a rawn inlar, Italy international hian siphurh a sut bakah corner a hlawh chhuak a, corner aṭanga ball kal hi defender De Ligt-a'n chakna goal khung nan a hmang.

Vanneihna
Juventus coach Massimiliano Allegri chuan, "Harsana tawk chungin kan chak, point thum kan hmuh danah kan vannei hle. Hmasawnna tur tam tak kan la nei, a bik takin goal khung dawna ball in pek kual dan kan hriat bel a ngai," a ti.

Milan nen an inhnehtawk ṭumin Allegri hian thinrim tih hriat takin khelmual a chhuahsan, tun ṭumah erawh an chak tak avangin a hmelah a lawm tih a lang. Pathianni zana Sampdoria an hmachhawn hunah hlim zui a tum ang.

Italian manager Allegri chuan, "Match zawng zawnga chak vek theih a ni lo, chutih rualin chak loh reng theih pawh a ni bik lo. Tun ṭuma kan chak hi a pawimawh hle, league table en loin keimahni team hi kan in en tur a ni ang," tiin a sawi.

Milan an inkhek
Season hmasa khan AC Milan hian bul an ṭan fuh a, champion an beisei ngam. Mahse, season chawhnu lamah an zuih, a tawpah pahnihna chu ni mah se champion Inter Milan an phak lo viau, manager Stefano Pioli-a'n fing taka player siksawi a tum tawh.

Venezia lakah Zlatan Ibrahimovic, Olivier Giroud, Davide Calabria leh Rade Krunic te an chhawr thei lo a, heti chung hian defender pawimawh Theo Hernandez chu bench-ah a dah, khelmual a luh hnuah Brahim Diaz goal khung tur a siamsak bakah an goal hnihna a khung.

Pioli chuan, "Season hmasa lama kan buaina khan zirlai ṭha tak min zirtir a, chetsual nawn loh kan tum. Inkhel ṭhenkhatah chuan huaisen taka player siksawi a ngaih chang a awm, tun ṭum kha chutiang zinga pakhat chu a ni," a ti.

Italy
Serie A
Salernitana 2 - 2 Verona
Spezia 2 - 3 Juventus
Cagliari 0 - 2 Empoli
AC Milan 2 - 0 Venezia