Mohun Bagan leh ISL an mualpho

AFC Cup-ah Indian Super League club chhuanvawr ATK Mohuan Bagan an mualpho a, inter-zone playoff semifinal-ah Uzbekistan club ṭha FC Nasaf chuan 6-0 ngawtin an sawp!

Mohun Bagan defender Pritam Kotal chuan minute lina lekah an lamah a tilut nghal a, Kolkata club an tho leh tawh lo - Khusayin Norchaev chuan hattrick a siam a, Oybek Bozorov leh bench aṭanga luhtir Donier Narzullaev-te chuan goal khat ve ve an khung bawk.

ISL lama hming ṭha tak Bagan boss Antonio Habas-a'n Nasaf hneh tura an ṭhat tawk thu sawi mah se Asia ram lian lakah an la ṭha tawk lo. Kolkata club hian kawng tinrengah Uzbekistan club hi an tluk lo - goal tam zawk chhuah thei an ni a, ISL level a la sang tawk lo tih finfiah a ni.

Goal khat khungtu Bozorov-a'n minute 42-naah penalty hlah lo phei se Bagan hi an mualpho zual ang.

Bagan keeper Amrinder Singh-a'n goal ruk ngawt a chhuah chungin Kolkata club tana khel ṭha bera chhal ngam a ni a, hei hian inkhel dinhmun thui takin a hrilhfiah a - ISL dinhmun chiang takin a lantir bawk.

Nasf lamin vawi 29 ngawt shot an neih laiin Bagan erawhin vawi khat shot an nei ve hram a, goal zawnah a la kal lo zui - Australian League ai pawha player-in an hlawh ṭhatna nia sawi ISL chu league dang lakah chuan a la sang lo hle tih a chiang. Bagan hi kum eng emaw zat chu ISL-a team ṭha ber pawl an ni a, Asia-ah erawh an nawi hle.

Roy Krishna leh David Williams meuh pawh tlarhnung pui tura an tlan let fo a ṭul a, Finland tana Euro khel zo hlim Joni Kauko pawhin Kolkata club tana a match hmasa ber khel mah se tih theih a nei bik lo - hriatreng aiin theihnghilh a duh zawk ang.

Bagan hian group D-ah Bashundhara Kings, Bengaluru leh Maziya S&RC khelhpuiin match thumah point sarih an nei a, group hmahruaitu ni chungin inter-zone playoff semifinal hi an lut.

Nasaf lakah hian hnehna chang se Inter-zone play-off final (semifinal tlukpui) lut thei an ni a, mahse, an hun ṭha neih hmang ṭangkai loin an mualpho ta zawk.

Kum 2009 khan Bagan hian group stage match-ah Al Kuwait chu 6-0 thoin an lo hneh lo tawh a, AFC Cup-a an record duhawm lo tak an nih rual.

Nasaf hian kum 2011 khan 90 leh 4-0 (13-0 agg.) in Indian club Dempo an lo hneh tawh a, hemi kum hian an champion - kum tam tak hnuah Indian club an sawp leh a, champion an beisei ang.

Inkhel Result
Nasf 6 - 0 ATK Mohun Bagan
NAS: Pritam Kotal 4' (OG); Khusayin Norchaev 18', 21', 31'; Oybek Bozorov 45+1'; Donier Narzullaev 71'