Spurs-in Wolves an hneh

League Cup third round-ah Tottenham Hotspur chuan 2-2 in Wolverhampton Wanderers inhneh-tawkpui mah se penalty hmangin 3-2 in an chak a, last 16 an lut.

Spurs tan hian Tanguy Ndombele leh Harry Kane te chuan minute 23 chhungin goal hnih an khung hman a, awlsam takin an chak dawn emaw tih laiin Wolves tan Leander Dendoncker leh Daniel Podence te chuan si phurh an rawn sut a, penalty pet a ngaih phah.

Spurs tan Pierre-Emile Højbjerg chuan penalty hi chhuih lut lo mah se Bryan Gil, Sergio Reguilon leh Harry Kane ten penalty an pet lut a, Wolves tan Hwang Hee-chan leh Joao Moutinho ten khung mah se Ruben Neves, Dendoncker leh Conor Coady ten an hlah avangin Spurs hi 3-2 in an chak.

Tottenham-in Crystal Palace leh Chelsea an ngam loh hnuah penalty hmangin Wolves an hneh hram a, an tana chanchin lawmawm erawh match li chhung goal khung tawh lo Kane-a'n goal a khung leh ta hi a ni ang.

Spurs coach Nuno Espirito Santo chuan, "Kane hian tih theih tam tak a nei a, a pawimawh ber erawh game a ni a, hma kan sawn a, ke kan pen ho zel a ṭul a ni," tiin a sawi.