Monaco GP tlan dan danglam dawn

Formula 1 Monaco Grand Prix hi ram danga inelna dangte ang lo takin ni li chhung neih ṭhin a ni, season tharah erawh ram dang ang bawkin intlansiak hi ni thum chhunga neih a ni ang.

Season dangah chuan Ninganiah qualifying hmasa an tlan a, ni khat chawlh an neih hnuin Inrinni leh Pathianniah inelna tak an hmachhawn ṭhin. Ram dangah chuan Zirtawpni aṭanga Pathianni thlengin chawlh nei loin an tlan ṭhin thung a ni.

Hripui lengin khawvel a tibuai a, calendar siam tawh sa pawh tih danglam a ngai fo ṭhin. Hei vang hian F1 thuneitu lam chuan Monaco GP kalphung pawh an tidanglam, inelna dangte nena siamrem a ngaih thut pawha a buaithlak loh nana tih a ni ang.

F1 president Stefano Domenicali chuan, "Monaco GP chu ni thum chhunga tlan a ni ang, chawlh a awm dawn lo. Kalphung thar hi season thar aṭanga hman tur a ni ang," a ti. F1 season tharah hian intlansiak vawi 23 awm tura ruahman a ni.