Nadal dinhmun a ṭha

Rafael Nadal chuan tun season chhungin match khel dawn tawh lo mah se, tunah chuan a dinhmun a ṭhat leh tawh thu a sawi - season tharah beiseina sang tak nen tennis court-ah a lo kir leh ang.

Grand Slam vawi 20 champion tawh Nadal hian hliam vangin Wimbledon, Tokyo Olympic leh US Open a khel lo. French Open hnu khan a chawl a, US Open inbuatsaih nan khan New York-ah inelna hmachhawn leh zuai mah se a ke a hliam avangin a khel zo thei lo.

Kum 35 mi Nadal chuan, "A ke pawh a dam zel, taksa leh rilru a chawl hahdam a, tunah chuan zawimuangin hmalam ka pan ve leh thei ta. A rang thei ang bera inkhelh leh duh mah ila dam chian hun ka nghah a ngai," a ti.

Tennis season kal laiah Grand Slam pali an khel zo tawh, inelna neih hmabak zingah ATP Finals chu a langsar a ni a, a thiam zual pariat inelnaah Nadal a tel lo ang - Roger Federer pawh hliam vang bawkin a season a tawp tawh.

Season a tawp hnai a, chutih rualin tennis season hi January thlatir aṭanga khelh ṭan ṭhin a nih avangin 2022 season a hnai leh tawh hle. Nakkum January thlaah Australian Open an khel dawn a ni.