Asensio hattrick hmangin Real chak nuamsa

Marco Asensio chuan Nilaini zan khan Real Madrid tan hattrick a siam a, an mikhual Real Mallorca chu 6-1 in an sawp - La Liga table chung ber an luah zui.

Real Madrid tan Karim Benzema chuan goal hnih a khung a, Isco chuan goal khat a khung bawk - Mallorca tan Lee Kang-in chuan goal khat khung ve bawk mah se mualpho zualpui khuhna chauh a ni.

Nilaini zan inkhel dangah Sevilla chuan 3-1 in Valencia an hneh ve bawk a, league match nga an khelhah point 11 an nei ve ta bawk. Valencia erawh an league match hmasa palia an tlawm loh hnuin an match hnuhnung pahnihah an tlawm ve ve a, insiamṭhat vat an mamawh.

Cadiz khelmualah nizan khan Barcelona an lenglut a, tun hnaia chanchin ngah tak Catalan club hi an result erawh kan hre hman lo.

Benzema phawt
Real Madrid-in inkhel ṭan aṭanga minute thumna lekah goal an khung nghal a, Karim Benzema chuan defender Josep Antoni Gaya Martinez chetsual zarzoin goal hmahruai hi a khung.

Benzema hian minute 78-naah a goal hnihna a khung bawk a, a goal khung inkarah hian Asensio chuan hattrick a siam fel der tawh - Benzema hian La Liga-ah match 389 khelin goal 200 a khung tling tawh.

Asensio goal khung pahnih chu Benzema siamsak a ni a, French striker hian tun season La Liga-ah match ruk khelin goal riat a khung tling der tawh a, assist vawi sarih a nei bawk.

Real chhuahsan tur anga sawi thawm awm reng Isco chuan minute 84-naah goal khungin a hnu a rawn khar a, a thiam a la theihnghilh lo tih a pholang.

Hattrick boy
Asensio-a'n minute 24-naah a goal hmasa ber a khung ṭan a, goal a khung hian 2-0 a ni chiah. Mahse, Mallorca tan South Korean attacking midfielder Lee Kang-in chuan minute khat pawh a liam hmain goal khat a rawn khung ve zui.

Kum 2015-a Mallorca aṭanga Real Madrid pantu Asensio-a'n a club hlui lakah zahngaihna lantir a duh lo a, Mallorca goal khung aṭanga minute linaah a khung ve leh - minute 55-naa a hattrick siamna goal a khung meuh chuan chak tur a chiang tawh.

Mallorca academy chhuak Asensio hian tun hnaiah sawiselna a tawk nasa a, season hmasa khan Real tan match 48 zet khelin goal sarih khung mah se Luis Enrique-a'n Euro-a Spain squad-ah pawh a telh lo.

Tunah erawh kum 25 mi winger hian a theihna a pholang ve leh ta a, Enrique pawhin a ngaihtuahna a seng ṭha ngei ang. Season duhawm tak hmangtu Vinícius Júnior pawhin goal khung lo mah se Isco khung tur a siamsak a, Carlo Ancelotti hnuaia a hmasawnna hmuh turin a awm zel.

Sevilla an chak
Nilaini zan inkhel ngaihven hlawh dangah Sevilla-in minute 22 chhungin goal thum an khung a, an mikhual Valencia laka hnehna chan nan a tawk.

Sevilla tan hian Papu Gomez chuan minute thumna lekah goal hmahruai a khung a, Erik Lamela ball pek aṭanga a khung a ni - Tottenham Hotspur aṭanga Spain lama pem Lamela hian La Liga match li a khelhah goal thum a khung tawh bawk.

Minute 15-na a ni a, Valencia an insiamṭha hman lo. Sevilla bawkin Gonzalo Montiel hmangin an goal hnihna an khung a, minute sarih a liam chauh tihin Rafa Mir chuan an goal thumna hmangin a belhchhah zui.

Julen Lopetegui-a enkawl team-in goal thum an khung hma a, an vannei. Valencia tan Hugo Duro chuan minute 31-naah khung ve mah se goal dang an nei thei lo a, a tawpah 3-1 in Valencia an tlawm.

Inkhel Results
Espanyol 1 - 0 Alaves
ESP: Raúl de Tomás (P) 54'

Sevilla 3 - 1 Valencia
SEV: Papu Gomez 3'; Gonzalo Montiel 15';
Rafa Mir 22'
VAL: Hugo Duro 31'

Real Madrid 6 - 1 Mallorca
REA: Karim Benzema 3', 76'; Marco Asensio 24', 29', 55'; Isco 84'
MAL: Lee Kang-In 25'

Villarreal 4 - 1 Elche
VIL: Yeremi Pino 5'; Manu Trigueros 39'; Arnaut Groeneveld 60'; Alberto Moreno 90'
ELC: Johan Mojica 19'