Rodriguez-a'n Al Rayyan a zawm

Colombian playmaker James Rodriguez chuan Everton aṭangin Qatari club Al Rayyan a zawm a, a man zat hi tarlan a ni lo. Real Madrid leh Bayern Munich midfielder hlui hian kum 30 chauh niin European football a kalsan dawn.

Rodriguez hian FIFA World Cup 2014-ah khan goal ruk khungin top scorer a ni a, hming langsar apiang la ṭhin Real Madrid-in an lalut nghal. Amaherawhchu Spanish club-ah beisei a phak loh avangin Bayern Munich-ah loan hmangin a kal a, Rodriguez hian kum 2020 khan Carlo Ancelotti hnung zuiin Everton a zawm.

Toffees-ah hian Rodriguez-a'n bul ṭan ṭha mah se hliam vangin a khel tam tawk lo a, match 23-ah goal ruk a khung. Rodriguez a vanduai a, amah sawm luttu Ancelotti-a'n Real Madrid a pan san a, manager thar Rafael Benítez-a'n a chhawr lo. Season liam ta khan Covid-19 vangin inkhel entu an awm lo a, Colombian playmaker hi Toffees ṭantu hmaah vawi khatmah a khel lo.