January aṭangin 'safe standing' phal dawn

Kum 25 hnuah Premier League leh Championship stadium-ah ding chunga inkhel en an phal dawn a, nakkum January aṭangin enchhinna neih ṭan a ni ang.

League pahniha club-te zingah safe standing hmang duh an awm a nih chuan Sports Ground Safety Authority (SGSA) hnenah October 6, 2021 hmain dilna an thehlut thei ang. Dilna remtihsak club-te chuan January 1 aṭangin season tawp thlengin an stadium-ah ding chungin inkhel an en thei dawn a ni.

Safe standing chu
Safe standing chu him taka ding chunga inkhel en theihna tihna a ni a, chi hrang pathum a awm thei ang. Chungte chu bolt-on seats, fold-away seats leh rail seats te an ni.

Bolt-on seats-ah chuan UEFA hnuaia match, ṭhutna awm ngei a ṭulnaah bawlṭu (bolt) hmangin ṭhutna an kilh a, inelna zawhah ṭhutna an la sawn leh mai ṭhin. Bundesliga-ah chuan safe standing hi phal a ni a, hetiang hi Schalke 04, Borussia Dortmund leh Borussia Monchengladbach ten an hmang.

Fold-away seats chu a hming ang hi a ni a, ṭhutna hi din dawn chuan a inthlep mai a, vawn chhan tur an dah ṭhin bawk. Chutihrualin UEFA hnuai inelnaa ṭhutna awm ngei tur a nih chuan vawn chhan hi an la sawn mai ṭhin.

Rail seats hi a lar ber a ni a, Bundesliga club chanve dawnin an stadium-ah an hmang. Kawng chen velah vawn chhan a awm a, vawn chhanah hian ṭhutna dah tel a ni. UEFA hnuai inelnaah ṭhut theihin an siam a, inelna danin ṭhut kher a phut lohnaah chuan ṭhutna hi an titawm thung.

Phal loh chhan
England-ah hian ding chunga inkhel en an phal lohna chhan chu Hillsborough disaster vang a ni a, he chhiatnaah hian mi 97 an thi. April 15, 1989 khan Hillsborough Stadium-ah Liverpool leh Nottingham Forest ten FA Cup semifinal an khel a, stadium leng bak mipui an punkhawm avangin pawng tawng innekna/inchilna a thleng a, chhiatna rapthlak hi a thleng ta a ni.

Hillsborough disaster vang hian zirchianna neih a ni a, stadium chu mipui him theihna turin ruahmanna thar an siam. Premier League-ah chuan 1994-95 season aṭangin enna zawng zawng chu ṭhutna a awm vek tur a ni a, ding chunga inkhel en phal a ni lo.

An inpeih
SGSA chief executive Martyn Henderson chuan, "SGSA chuan mipui himna leh nuam tihna a ngai pawimawh a, mipuiin ding chunga inkhel en an duh. Ding chungin him takin inkhel a en theih a ni tih chu zirchianna aṭangin a hriat theih a, sorkarin ruahmanna a siam hmain inelna sang pahnihah kan enchhin dawn a ni," tiin a sawi.

Premier League club ṭhenkhat chuan danin a phal hun atan tiin stadium chhungah rail seats an dah tel tawh. Manchester United chuan J Stand-ah mi 1500 lenna rail seats an dah tawh a, Manchester City pawhin South Stand-ah mi 5,620 lenna an rail seats an dah tawh bawk.

Chelsea-in Stamford Bridge-ah ding chunga inkhel en theihna hmun thumah an siam tawh a, Liverpool pawhin Kop leh Anfield Road Stand-ah mi 7,800 ding chunga inkhel en theihna an buatsaih tawh.

Premier League club dang Leeds United, Tottenham Hotspur leh Wolverhampton Wanderers te pawhin kum hnih liam ta khan an buatsaih tawh a, danin an phalsak hun chiah hi an nghak tawh a ni.