Messi tel loin PSG an chak

Khup hliam vangin Lionel Messi a inkhel ve thei lo a, a team Paris St-Germain erawh an la chak zel. Hun tawp dawna Achraf Hakimi goal hmangin Metz chu 2-1 in an luh chhuah.

Paris club hian season hmasa khan Ligue 1 nomawi chu Lille lakah an chan, kuminah erawh match sarih an khelh tawh chinah an la chak vek - point 21 hmuin hma an hrai fal leh tawh hle. Pahnihna Marseille chuan point 14 chauh an la nei.

Mauricio Pochettino naute hi chak pup pup tia sawi tur an ni lo, chutih rualin point thum hmuhna tawkin an chak zel. Metz lakah pawh Hakimi-a goal khung hmasa chu chawlhlawk hmain Boubakar Kouyate-a'n a sut.

Hun tawp dawn thlengin goal a lut zawm dawn lo a ang hman. Mahse, minute 90+1-ah captain Dylan Bronn chu ṭul lo taka ball a per luih avangin yellow card pahnihna pek niin an hnawt chhuak, hamrik hnuhnung rik hmain Neymar ball pek dawngtu Hakimi-a'n chakna goal a khung.

PSG coach Poch chuan, "Match khelh tur kan ngah, chawlh hah-damna mumal awm loin kan inkhelh zel a ngai, chutiang kara point thum kan hmu ṭhin hi a lawmawm," tiin a sawi

Ligue 1 hmahruaitu hian Inrinni zanah Montpellier an hmachhawn leh nghal dawn. Kar lehah Champions League group match khel turin Manchester City an mikhual zui leh nghal bawk ang.

France - Ligue 1
Lille 2 - 1 Reims
AS Monaco 3 - 1 Saint-Etienne
Montpellier 3 - 3 Bordeaux
Nantes 3 - 1 Brest
Rennes 6 - 0 Clermont
Angers 0 - 0 Marseille
Lens 0 - 1 Strasbourg
Lorient 1 - 0 Nice
Lyon 3 - 1 Troyes
Metz 1 - 2 PSG