Chelsea-in Villa an hneh

Stamford Bridge-ah Chelsea leh Aston Villa hun pangngaiah 1-1 in an inhnehtawk a, penalty shootout-ah Blues hi 4-3 in an chak. Nilaini zan Carabao Cup inkhel hmuhnawm takah hian mualneituin Timo Werner hmangin an khung hmasa a, Villa tan Cameron Archer-a'n siphurh a sut.

Thomas Tuchel leh Dean Smith ten player ṭha an awltir chungin Blues tana bul ṭantute hming a la langsar hlawm hle. Villa-in bul an ṭan ṭha zawk a, kum 19 mi Archer-a'n keeper chauh hmachhawn mah se Kepa Arrizabalaga-a'n a dansak.

Germany international Werner-a'n tun season-a bul a ṭan hmasak berah goal a khung a, Reece James-a cross chu minute 54-naah a tauh lut. Chelsea striker hian chance ṭha a hlah zui a, a hmingṭhatna a belhchhah thei lo.

Villa-in minute 10 hnuah goal an khung lehnghal a, Matty Cash cross chu Archer-a'n ṭha zetin a tauh goal - keeper Kepa a dem theih loh. Archer hian third round an luh theih nan Barrow 6-0 a an hneh ṭumin hattrick a siam tawh bawk.

Chelsea-in Romelu Lukaku, Mason Mount leh Ross Barkley te luhtirin na zawkin nawr mah se goal dang a luh belh tawh lo. Penalty shootout-ah Villa veteran player Ashley Young-a'n a hlah hmasa ber a, Marvelous Nakamba-a'n a hlah leh bawk.

Blues tan palinaa rawn pen chhuak Ben Chiwell-a'n crossbar pet per mah se Romelu Lukaku, Mason Mount leh Ross Barkley ten an pet lut vek a, Reece James-a'n chakna goal a khung.

Spanish keeper Kepa-a'n UEFA Super Cup-ah Chelsea hi penalty shootout-ah a chakpui tawh a, Aston Villa lamah Copa America-a Argentina champion puitu keeper Emiliano Martinez a inlan lo thung.

Thomas Tuchel-a hote hian September 25, Inrinni zanah Premier League champion Manchester City an mikhual dawn a, inkhel hmuhnawm bik a ni ang.