Arsenal an chak awlsam

Arsenal chuan League One club AFC Wimbledon 3-0 in an hneh a, harsa lo takin Carabao Cup last 16 an lut. Mikel Arteta naute hian inelna hrang hrangah a zawnin match thum hnehna an chang ve ta. Fourth round-ah chuan Leeds United nen an inkhel leh ang.

Nilaini zan Emirates Stadium-a inkhelah Gunners tan Alexandre Lacazette chuan April thla hnuah a vawi khat nan bul a ṭan a, minute 11-naah goal a khung - inkhel chawhnu lamah Emile Smith Rowe leh Eddie Nketiah ten an khung ve bawk.

Arteta-a'n chak ngei a tum a, a player neih ṭhat ber chhawp chhuak lo mah se chak tumin team a rem. Premier League season kal laia a chhawr tawh deuh vek an lut, striker Nketiah chiah league match la khel lo a ni.

North London club hian goal thum an khung bakah woodwork vawi hnih an tih per bawk a, goal tam zawk khung thei dinhmunah an ding; mikhual team lamin target zawna pet an nei ve miah loh avangin Arteta naute tan hlauh tur a awm lo.

Arsenal hi an league match hmasa pathumah an tlawm vek a, sawisel an hlawh nasa hle. Tunah chuan a zawna league match vawi hnih an chak hnuah League Cup-ah result ṭha an nei leh, an match leh pek atan Pathianni zanah Tottenham nen North London Derby an khel ang.

Gunners manager Arteta chuan, "Inkhelh duh player kan ngah, mahse vawi khatah an lut vek thei lo. Khelhna hmun inchuh an ni a, chu chuan rah ṭha tak a chhuah niah ka ngai. Match pawimawh kan khel zui dawn a, inrintawkna kan nei thei hi a lawmawm," tiin a sawi.

A zawna vawi thum an chak tak avangin Arsenal an phur thar leh tawh, an match hmabakah Tottenham hi 2-0 china an hneh thei a nih chuan an hmelma club chungah an awm thei leh der tawh dawn.