City 1-1 Liverpool: Ropui zawk an awm lo

English football ngainatute nghahhlelh Premier League match-ah Pathianni zan khan Manchester City chuan Liverpool an mikhual a, inkhel hmuhnawm hi 1-1 in a tawp.

Reds tan Mohamed Salah chuan penalty hmangin goal hmahruai a khung a, City tan Gabriel Jesus chuan an si phurh hi a sut - Kevin de Bruyne chuan penalty-a hlah thung. 

Inkhelh zawha sawi hlawh ber erawh fixture hautak a ni a, City boss Pep Guardiola leh Reds manager Jurgen Klopp-te chuan Premier League-a substitution panga neih ṭul an tih thu an sawi ve ve. 

City leh Liverpool inkhelh hmain Klopp-a'n  Diogo Jota leh Roberto Firmino-ah tu nge a luhtir zawk ang, tih chu inzawhna a ni a, German coach-in rin loh taka 4-2-3-1 rawn hmangin player pahnih hi Mohamed Salah leh Sadio Mane bulah a khelhtir. 

Inkhel ṭantir lamah Klopp-a ruahmanna a fuh tih a lang a, Liverpool goal nawr a na takzet - minute 13-naah player taima Mane-a'n penalty a hlawh chhuak a, Salah chuan goal-ah a chantir.

Mahse, City an zam bik lo. Minute 31-naah KDB chuan Jesus tan a siamsak a, Brazilian striker hian rang zeta ball vir puiin goal-ah a chantir a, goal mawi bik a ni. 

KDB a pawi

City-in an si phurh an sut hnuah ngai an awh chho a, Liverpool aiin an hlauhawm zawk - Reds defender Joe Gomez-a handball zui a, VAR hmanga rei tak en a nih hnuah referee-in penalty spot-a kawk. 

Ball pet thiam bik KDB a lo pen chhuak a, Belgian midfielder hian Alisson bum mah se goal ban pawn lamah a pet. City-in an hun ṭha an chhawr lo a, hun tawp thlenga goal dang khung loin Liverpool ang team laka 'chance' chhawr loh pawizia an hria. 

Season hmasa Premier League-a City leh Reds inkhelah goal riat ngawt a lut a, tun season-ah erawh a danglam ta. Liverpool right back Trent Alexander-Arnold a inhliam a, he thu buatsaih lai hian a dinhmun a la chiang lo - international break-ah ram tan a inlan thei dawn lo chiang thung. 

City hian table-ah 10-na dinhmun an luah a, league match sarih aṭangin point 12 chauh an la nei - mahse, Liverpool laka an khelh dan enin chak an phu a, lawmna tur a tam zawk. 

Tlarhnung an buaina chu Aymeric Laporte leh Ruben Dias inkawpin an chingfel ta niin a lang bawk a, league hmahruaitu Leicester City an phak lohna hi match khata khel tlem chungin point ruk chauh a ni tih hriat tel a ṭha. 

Liverpool pawhin an dama bul ṭan chiang Virgil van Dijk, Fabinho leh Thiago Alcantara chhawr thei lo chungin an khel a, Etihad Stadium-a point an hlawh chhuak hi an lawm ang. 

Inkhelh zawhah Klopp leh Pep an titi a, City boss Pep chuan, "Substitution panga neih chungchang kan sawi a ni. Khawvel hmun dangah substitute panga an la hmang vek a, hetah erawh a danglam si," a ti.

Klopp chuan, "Ka naute hi dinhmun derthawng takah an awm a ni. Nilainia inkhel tan zanin kan inkhelh hun anga inkhelh leh hi a hma lutuk a, eng team tan mah ka duhsak lo. Football hmuhnawm in en duh maw? Chawlhna hun min pe rawh u," tiin a sawi.

 

German coach chuan an inkhel chu, "Top game dik tak a ni. Rang taka inkhelha game tihtawp vat kan duh a, mahse City hi team ṭha an nih avangin a theih bik loh a ni," a ti a, Pep chuan, "An khelh dan en ila, kan chhanlet dan a ṭha hle a ni," tiin a sawi ve bawk.