Kane-a'n goal 150 a khung ta!

Pathianni zan Premier League inkhelah Tottenham Hotspur chuan Harry Kane goal khung hmangin West Brom chu 1-0 in an hneh a, Kane-a'n Premier League-a goal 150-a khung tlinna chiah a ni bawk. 

Team pahnih hi goal khung loin an ṭin mai dawn niin a lang hman a, mahse hun tawp nan minute hnih chauh a awm tawh tiha Baggies defender inthlahdah zeuh karah Kane hian goal awmchhun a khung. 

Kane-a'n Premier League goal 150 khung tling turin match 218 chauh a mamawh a, Premier League-a heti zat goal khung tura game mamawh tlem lamah Alan Shearer (212) leh Sergio Aguero (217) chiah a tluk lo - Kane hian assist 32 a nei tel. 

Spurs manager Jose Mourinho chuan, "Kane hian goal khung bakah hna dang tam tak a thawk tel a ni. Zanin kan inkhel pawh kha en ula, number six anga khelin defence hmaah ball a chuh let thei hial.

"Harry Kane chungchang sawi chuan a goal khung, assist, ball chuh let, boruaka ball chuh sak, sawi tur a tam em em a ni," a ti a, Kane chu goal khungtu chauh a nih loh thu a sawi. 

English striker hian Spurs tan tun season Premier League-ah match riat khelin goal sarih a khung tawh a, assist vawi riat a nei tawh bawk.