PFA Player of the Year award sem dawn

Professional Footballers' Asso­ciation Players' Player of the Year chawimawina dawng thei tur player paruk hming chhawpchhuah a ni a, league hmahruaitu Manchester City player pathum David Silva, Kevin de Bruyne leh Leroy Sane te hming a lang.

Man City player pathum bakah hian Premier League top scorer nilai Liverpool forward Mohamed Salah leh Tottenham striker Harry Kane te an awm a, Manchester United goalkeeper David de Gea chu keeper awmchhun a ni bawk.

PFA Young Player of the Year award dawng thei zingah Kane hming a la tel thei bawk a, Fulham left back Ryan Sessegnon (17 years), Sane (22), Raheem Sterling (23), Brazil goalkeeper Ederson Moraes (24) leh Manchester United Marcus Rashford (20) te chu chawimawi theih zingah an lang bawk a ni.

De Bruyne
A vawi thum nana Premier League champion ni mai tur Manchester City midfielder De Bruyne hian 2015 khan pound maaktaduai 55-in Etihad Stadium a pan a, City player manto ber a ni.

Kum 26 mi De Bruyne hian tun season chhungin a ṭhiante goal khung tur vawi 15 a siamsak tawh a, ani aia assist nei hnem an awm lo. Ball pass a thiamin a cross a hlauhawm a, set piece hmang thiam a nih bawk avangin goal 11 khung tawhtu midfielder hi lawmman dawng thei tura langsar a ni ang.

De Gea
Tun hnai season nga chhung chu PFA's team of the year-ah De Gea hming hi vawi li ngawt a lang thei. Kum 27 mi hian kuminah league match 32 a khelh aṭangin clean sheet vawi 16 a nei a, record nei ṭha ber a ni.

Spain international hian goal shot a hmachhawn zingah 80% chu a dang thei a, Europe league lian panga (England, France, Italy, Germany leh Spain) ah record nei ṭh pathumna a ni phak.

Harry Kane
Tottenhman striker Kane-a'n league goal 25 a khung tawh a, a elpui Salah aiin goal ngain a khung tlem mek. Spurs thiampuipa hian Arsenal striker Thierry Henry hnungzuiin a zawna a vawi thum nan EPL top scorer nih a beisei mek.

England international hian tun hnai season li chhung chu league goal 20 a khung tling ziah a, Alan Shearer, Henry leh Sergio Aguero te nen huang khatah an awm.

Salah
Liverpool forward Salah-a'n league match 33 a khelh aṭangin goal 30 a khung tawh a, a club hi league table-ah pathumna a nihpui mek.

Egypt international hi tun season chhungin Reds goal 50 zetah inrawh tawhin, Champions League semifinal-ah a team hi a hruai thlen tawh bawk avangin player malkhaiah chuan ania aia cheṭha an awm bik kher lo ang.

Sane
Schalke aṭanga pound maktaduai 46.5 zeta Manchester City zawmtu Sane hi Pep Guardiola kaihhruaina hnuaiah a vul mek a, a tlan chakin ball a thiam a, City goal nawrna thapui a ni.

German international hian City tan tun season chhungin inelna hrang hrangah match 44 khel tawhin goal 13 a khung a, a ṭhiante khung tur vawi 16 a siamsak bawk.

Silva
Manchester City inkhel mawina ti zualtu chu David Silva a ni. Spain international hi pa lian ni lo mah se, a thluak ṭhatna hmangin khelmual chhunga roreltu a ni ṭhin.

Kum 32 mi Silva hian assist vawi 14 a nei tawh a, a dam a nih phawt chuan player ṭha rual awmkhawm zingah inkhel tura thlan zingah a tel ṭhin.