Nadal leh Djokovic Inhmachhawn thei dawn

Clay court inelna ngaih­­hlutte zinga mi Monte Carlo Masters khelh ṭan mek a ni a, vawi­in aṭangin player lang­sar ṭhenkhat an inlan ṭan ang. World number 1 Rafael Nadal leh a elpui Novak Djokovic te chu an chak chho zel a nih chuan quarterfinal-ah an inhma­chhawn thei dawn a ni.

Seeded pakhatna Nadal hian nikum khan a vawi 10 nan Monte Carlo nomawi hi a chawi a, kuminah hian first round chu bye tir niin, Aljaz Bedene leh qualifier aṭanga inhlangkai dang pakhat inkhela chak zawk a hmachhawn ang.

Grand Slam vawi 16 champion tawh Nadal chuan, "Monte Carlo Masters nomawi vawi 10 ka chawi tawh a, nomawi dang chawi leh chu duhthusam a niin, a theih lohna chhan tur pawh ka hre lo," tiin champion leh ngei a tum thu a sawi.

Nadal hi January thla a khelh zawh tak Aus­tralian Open-ah khan a inhliam a, thla thum chhung deuhthaw a chawlh hnuah kar hmasa khan an ram tan Davis Cup a khel ve leh chiah a, quarterfinal-ah Spain chu Germany lakah hnehna a chan pui a ni.

Kum 31 mi Nadal hian 2005 khan Monte Carlo-ah hian a nomawi hmasa ber a chawi a, tournament pakhata champion hnem ber a nih theihna kawngah hian Djokovic hi final-ah vawi hnih a hneh tawh a ni. Mahse, Djokovic hian 2013 khan Nadal hneh chungin nomawi a lo chawi ve tawh bawk.

Grand Slam vawi 12 champion tawh Djo­kovic hi tun hnaiah a tlahniam a, third round-ah Dominic Thiem nen an inhmachhawn theih dawn bawk avangin a kawng a awlsam dawn lo hle.

Seeded pahnihna Marin Cilic chuan a match hamsa berah Fernando Verdasco leh Pablo Cuevas te inkhela chak zawk a hmachhawn dawn a, rawlthar duhawm Alexander Zverev pawhin Gilles Muller a hma­chhawn ang. Kum 20 mi Zverev hian season hmasa khan Masters title pahnih a la a, kuminah pawh player beisei awm te zinga mi a ni.