Tlai dar 5-ah UCL final rematch Chelsea vs Manchester City

Vawiin tlai dar 5:00 hian Premier League inkhel hmuhnawm bik en tur a awm dawn a, Stamford Bridge-ah league hmahruai mektu Chelsea-in champion lai Manchester City an mikhual dawn.

English club ṭha pahnih hi season liam ta Champions League final-ah khan an inhmachhawn a, Blues an chak.

Manager ṭha pahnih Thomas Tuchel leh Pep Guardiola vang te, club pahnihin player ṭha an kawl hnem avangte leh champion rinkai an nih avangtein inkhel hi en a châkawm takzet. Tuchel hian an inhmachhawn hnuhnung pathumah a hneh vek a, hei hian inkhel ngaihnawmna a belhchhah ang.

UCL final
Tuchel leh Guardiola-te hi Germany-ah an inhmachhawn tawh ṭhin a, Chelsea manager hian chak hmel a hmu ngai lo. Amaherawhchu England-ah erawh chanchin a inthlak hlawk a, Tuchel hi vawi thumah vawi thum a chak.

An intum hmasak pahnih FA Cup-ah Pep-a'n player ṭha ṭhenkhat a awltir a, league match-ah Sergio Aguero-a'n penalty a hlah bakah Man City ṭhat dan berin a inlan lo a, match hnihah hian Spanish manager tan chhuanlam theih tur a awm.

A vawi thumna chu Champions League a ni - Pep-a leh Man City-in Champions League nomawi an duh ngawih ngawih a, Tuchel-a'n an beiseina a tih thamralsak, 'sawisel boin' German manager hote an chungnung.

UCL final-ah Pep-a'n thutlukna mak tak a siam, defensive midfielder a neih pahnih Rodri leh Fernandinho te bench-ah a dah. Spanish manager hian ball chan tam duhin Phil Foden, Ilkay Gundogan leh Bernardo Silva-te midfield-ah a dah a, tlarhmaah Riyad Mahrez, Kevin de Bruyne leh Raheem Sterling te an awm.

Pep-a'n na takin nawr tum mah se Tuchel-a game plan a ngam ta lo a, Chelsea-in counter attack hmangin na takin an vaw let. Kai Havertz hmangin London club an chak a, goal khat chauh a lut chungin Blues hi final-ah chak phu zawk an ni.

A danglam ta
Tun ṭuma an inhmachhawnna tur hi Stamford Bridge a ni dawn a, mahni muala khel lo tur pawh ni se tun hnaia an khelh dan thlirin Chelsea hi chak tura rinkai zawk an ni ang. London club hian Romelu Lukaku chu Inter Milan aṭangin an lalut a, Belgian striker hian league match liah goal thum a khung der tawh.

Lukaku ringawt hi Chelsea hmachhuan a ni lo a, goalkeeper aṭanga striker thlengin player ṭha an ni. Player ṭha neihte thiam taka rem turin Tuchel a awm a, German manager hian inkhelh tawh chinah halftime chawlh leh substitution a hmang ṭangkai hle.

Edouard Mendy hi mawng bawr hliam vanga a la inlan thei lo a nih pawhin Super Cup leh League Cup-a team chakpuitu, khawvel keeper manto ber Kepa Arrizabalaga a awm. Tuchel-a'n a player zawng zawng chhawr theih tura a inpeihtir thei hi a fakawmna lai chu a ni.

Chelsea-in goal khat chiah an la chhuah a, Thiago Silva leh Antonio Rudiger bakah defender dangten fak an phu. Midfield-ah Jorginho, N'Golo Kante leh Mateo Kovacic te an rintlak. Blues hian tun season-ah hneh loh an la tawng lo a, Tuchel-a'n Pep-a kaihhruai Man City a zawna vawi li hneh a tum dawn a ni.

Mahse maw!
Manchester City hian Community Shield-a Leicester City an hneh loh hnuah Premier League match hmasa berah Tottenham an hneh lo a, league match hnuhnung berah Southampton nen goal awm awm loin an inhnehtawk.

Heng inkhel pathum aṭanga thlir chuan Man City hi Chelsea laka chak lo turah an ngaih theih ang. Mahse, Pep-a hote hian Blues ang thoin league-ah goal khat chauh an chhuah a, goal khung tam lamah pawh Man City hian goal khat chauhin London club hi an pha lo. Inelna hrang hrang thlir phei chuan Man City-in goal 23 an khung a, Chelsea aiin goal riatin an khung tam zawk.

Kevin de Bruyne leh Phil Foden-te an dam ṭha leh tawh a, Man City hi Stamford Bridge-a leng lut turin an inpeih. Premier League champion lai hian League Cup-ah Wycombe 6-1 in an sawp a, Tuchel-a hote an hneh thei a nih chuan match khat lekah Man City an thlir dan a dang daih ang.

Tuchel 3-0 Guardiola

Chelsea leh Manchester City hi kuminah vawi li an inkhel tawh a, match hnuhnung pathumah Thomas Tuchel-a kaihhruai Blues an chak vek. Kumtirah Pep Guardiola kaihruai Man City-in Stamford Bridge an luhchhuah a; Ilkay Gundogan, Phil Foden leh Kevin de Bruyne te goal hmangin 3-1 in an chak.

Amaherawhchu hetihlaia Blues enkawltu hi Frank Lampard a ni a, German manager Tuchel-a hnuaiah result a danglam thung. FA Cup semifinal-ah Chelsea-in Man City an pet tla a, goal awmchhun hi Hakim Ziyech-a'n a khung. Chelsea hian Premier League nomawi chawi mai tur Man City chu Etihad Stadium-ah 2-1 in an hneh a, Champions League final-ah Kai Havertz goal hmangin 1-0 in an hneh leh bawk.