King Kong pawh ka hmachhawn mai ang - Joshua

Inrinni zana Oleksandr Usyk nena inhnek tur Anthony Joshua chuan a hmaa ding chu 'King Kong' pawh ni se a hmachhawn mai tur thu a sawi a, "King Kong ka hmachhawn tur thu min hrilh pawh ni ula, ka ti mai ang. Hei hi ka hna chu a ni," tiin tumah a hlauh loh thu a sawi.

Joshua hian heavyweight boxing-ah WBA (Super), WBO, IBF leh IBO title a kawl mek a, Tottenham Hotspur Stadium-ah Usyk nen a kawnghren kawl lai pali hi an inchuh dawn.

Kum 31 mi boxer chuan, "Tu tan mah hmachhawn ka awlsam ngai lo a, fight neih hi ka nuam tih zawng a ni," a ti a, vawi 25 fight a hmachhawnah vawi 24 a chak tawh a, vawi khat a tlawm thung.

Joshua chuan sawi chhunzawmin, "Amateur boxing-ah rei tak hun ka la hman loh avangin Oleksandr hi ka hrechiang lo. Mahse, professional boxer ka nih hnuah ka inzir nasa a, Ukrainian style leh Ukrainian mipuite hi ka ngaina a ni," a ti a, Usyk chu a dahsan thu a sawi bawk.

Kum 34 mi Usyk-a'n media a hmachhawnnaah sap ṭawng a hmang thei lo a, ṭawnglettu rawih a ngaih avangin a ṭawng tam tawk lo.

Usyk chuan, "Joshua nen hian hriatreng tur thil kan hnutchhiah ka ring a, mipuiin an sawi zui a, television-a an en tur boxing hmuhnawm phochhuah kan duh a ni," a ti.

Ukrainian boxer Usyk hian vawi 18 fight a hmachhawn tawhah vawi 18 hnehna a chang a, tlawm a la nei miah lo. London 2012 Olympics-ah khan heavyweight-ah gold a la a, Joshua chuan khami ṭum vek khan super-heavyweight-ah gold a la ve bawk.

Joshua chuan, "Pathianin mal min sawm a, ka boxing zinkawng tur min kawhhmuh. Vawiinah hian malsawmna tam tak dawng leh hlim tak chungin in hmaah ka lo ding a, heng zawng zawng hi thleng tur ve renga ruatsaah ka ngai lo a, boxing hi ka tuichilh tlat a ni," a ti zui a, Usyk a hneh chuan WBC champion Tyson Fury nen intawng tura ngaih a ni.

British boxer rothap Joshua leh Usyk inhnek tur hi official tak chuan India-ah television-a pe chhuak tur an awm lo a, online kaltlangin DAZN-ah a en theih ang - DAZN hi thla khata Rs.69 chawiin India aṭang chuan a subscribe theih.

London khawpuia inhnek tur hi keini lam sanaah chuan Inrinni zan dar 10:30 aṭangin inhnek en tur a awm ṭan ang a, Joshua leh Usyk tak erawh Pathianni zing dar 2:40 bawr velah inhnek chauh tura ngaih an ni.